د ننګرهار د عامې روغتیا ریاست کې سرچېنو افغانستان انټرنشنل ـ پښتو ته ومنله چې د نننیو بارانونو او طوفانونو له امله ۳۵ تنه مړه او ۲۳۰ تنه ټپیان شوي دي. دوی زیاتوي؛ مړي او ټپیان د ننګرهار سیمه ییز روغتون ترڅنګ د بي بي فاطمه الزهرا ولایتي روغتون ته هم انتقال شوي دي.
د معلوماتو پر بنسټ؛ دغه کسان د جلال اباد ښار، سره رود او بهسود ولسوالیو څخه راوړل شوي دي.
هغه انځورونه او ویډیوګانې چې افغانستان انټرنشنل ـ پښتو ته رارسېدلي پکې لیدل کیږي، چې د سخت طوفان له امله د کورونو ترڅنګ د برېښنا ستنې او ونې وېجاړې شوي دي.
اوس مهال د ننګرهار په سیمه ییز روغتونو کې بېړنۍ حالت اعلان شوی دی.
د طالبانو تر کنټرول لاندې د ننګرهار د عامې روغتیا ریاست سرچېنې وايي؛ اوس هم له یو شمېر سیمو څخه مړي او ټپیان د لېږدولو په حال کې دي.
د رارسېدلو راپورنو له مخې؛ یوازې د ننګرهار سره رود ولسوالۍ کې د کور د چت راپرېوتو له امله لس کسان د خاورو لاندې شوي دي، چې ناتایید شوي راپورونه وايي، چې دغه کسان ټول مړه شوي دي.
