د طالبانو کورنیو چارو وزارت وایي، چې د هېواد په ۱۱ ولایتونو کې ۳۰ کسان د غلا، وژنې، قمار، د ناقانونه وسلو د ساتلو او د نورو جنایي جرمونو په تړاو نیول شوي. دوی زیاتوي، دا کسان په ننګرهار، بلخ، سرپل، کندهار، بغلان، کندوز، لوګر، نورستان، سمنګان، تخار او غزني ولایتونو کې نیول شوي.
د طالبانو د کورنیو چارو وزارت دغه راز په خپله خبرپاڼه کې زیاته کړې ده، چې له یادو ۳۰ کسانو څخه اته تنه یې د وژنو، اوه تنه د قمار او پاتې نور یې د بېلابېلو نورو جرمونو په تړاو نیول شوي دي.
د راپورونو له مخې، پر افغانستان د طالبانو له بیا واکمنېدو وروسته په هېواد کې د بېکارۍ او بې وزلۍ له امله جنايي جرمونه او د غلا پېښې زياتې شوې دي.
له دې سره، افغانستان بیا د نړۍ د نفوسو د سروې له مخې په ۲۰۲۳کال کې د جرمونو د کچې له مخې په نړۍ کې څلورم ځای لري.
دا په داسې حال کې ده، چې د طالبانو د کورنیو چارو وزارت تېر کال ویلي و، چې دغه ډله پلان لري، څو په کابل او د هېواد په بېلابېلو ولایتونو کې د امنیتي او جنایي پېښو د مخنیوي لپاره د څارنې او امنیتي کمرو یوه شبکه جوړه کړي.
د یاد وزارت ویاند عبدالمتین قانع ویلي و، چې دا پلان د طالبانو د نوې امنیتي ستراتیژۍ برخه ده او بشپړ تطبیق به یې څلور کاله وخت ونیسي.
ویل کیږي، چې طالبانو له یوه کال راهیسې د کابل په ګډون په یو شمېر لویو ښارونو کې تراوسه شاوخوا اتیا زره کمرې لګولي دي.
