د خيبرپښتونخوا په کوهاټ ولسوالۍ کې د ډبرو سکرو په کان کې د ګازو ډبې د ډکولو پر مهال چاودنه شوې، چې په پایله کې یې درې تنه کان کیدونکي مړه او څلور نور ټپیان شول. رسنیو د ځایي پولیسو له قوله ویلي، چې تر چاودنې وروسته یې دغه اووه تنه له خارو را ایستلي دي.
ځايي پوليس وايي، نن سهار چهارشنبه د (چنګاښ ۲۷مه) د کوهاټ په دره ادم خيل اخوروال سيمه کې د سکرو په یوه کان کې چاودنې دغه مرګژوبله اړولې چې مړه او ټپیان له خاورو لاندې شوي وو.
پولیس وايي، تر خاورو او خټو لاندې شوي ټول کسان را ایستل شوي او د درېیو تنو کان کیندونکو مړي یې خپلو کورنیو ته ور سپارلي دي.
پولیس زیاتوي، په دغه کان کې مړه شوي کان کیندونکي ټول د خیبرپښتونخوا د شانګلې ضلعې اوسېدونکي وو.
په دغه کان کې د چاودنې له امله څلور تنه ټپیان روغتون ته ليږدول شوي او روغتیايي حالت یې د ډاډ وړ ښودل شوی.
شنونکي وايي په پاکستان کې ډیری مهال کان کیدونکي د سکرو په کانونو کې تر لوړ خطر لاندې کار کوي او دوی په نامسلکي ډول کان کیندنه کوي چې د دوی ژوند خوندي نه وي.
