ایران: د دوغارون له لارې د ایران او افغانستان کلنۍ راکړه ورکړه له ۳میلیارد ډالرو زیاته ده

مهدي شېردل ویلي، دغه څه د ایران او طالبانو ترمنځ د ښو اقتصادي اړیکو د پیاوړتیا ښکارندویي کوي.
د ایرنا اژانس د راپور له مخې، هغه د پنجشنبې په ورځ د (چنګاښ په ۲۸مه) له یو شمېر ایراني چارواکو سره د کتنې پرمهال ویلي: دوغارون د ایران او افغانستان ترمنځ یو له اړینو اقتصادي لارو څخه دی.
د هغه په وینا، د ایران او خراسان رضوي د ولایت صادراتي توکي د افغانستان «دېرش مېلیون وګړو د اړتیاو د پوره کېدو لپاره اړین دي.»
د هغه په وینا، په دوغارون کې د اقتصادي خنډونو لرې کول د طالبانو د رضایت لامل ګرځېدلی.
د دغه ایراني چارواکي د څرګندونو له مخې، اوس‌مهال د دوغارون له لارې هره ورځ د ایران او افغانستان یو زرو ۲۰۰ لارۍ تګ راتګ کوي.
دا په داسې حال کې ده، چې په تېرو څو ورځو کې ایراني رسنیو راپور ورکړی چې د افغانستان دننه ۴۰۰ ایرانې لارۍ د هغوی د بارونو نه منل کېدو له امله ایسارې پاتې دي.
د صدا او سیما خبري اژانس راپور ورکړی، چې دغه لارۍ له ۲۳ ورځو راهیسې د افغانستان دننه له ګڼو ستونزو سره بندې پاتې دي.