د طالبانو د ټولګټو وزارت وايي، چې تېره اونۍ یې ۷۷ زره او ۵۰۶ مټریک ټنه توکي د اوسپنې پټلۍ له لارې لېږدولي دي. د دغه وزارت په خبرپاڼه کې راغلي، چې په تېره اونۍ کې یې د لېږدېدونکو توکو له ډلې ۷۵ زره او ۷۶۵ ټنه وارداتي او ۷۴۱ ټنه توکي یې نورو هېوادونو ته صادر کړي دي.
دغه وزارت د پنجشنبې په ورځ د (چنګاښ په ۲۸مه) د یوې خبرپاڼې په خپرولو سره ویلي، چې د دغو توکو ۶۵ زره او ۳۲۲ ټنه د اقینې بندر او پنځه زره او ۶۸۱ ټنه د تور غونډۍ له لارې لېږدول شوي دي.
د طالبانو د احصایې ادارې د مالوماتو له مخې، د افغانستان د صادراتو او وارداتو ټول ارزښت په ۱۴۰۲ کال کې ۱۰.۳ میلیارډ ډالره ښودل شوی و.
خو په افغانستان کې د طالبانو د واکمنۍ پر مهال داسې خپلواکې ادارې نه شته، چې د طالبانو د دغو ادعاو پخلی په خپلواکه توګه وکړي او رسنۍ هم نه شي کولای د طالبانو له سانسور پرته په خپلواک ډول خبرونه خپاره کړي.
