د ملي مقاومت جبهې مشر احمد مسعود په یوه تازه مرکه کې ویلي، چې د کابل له سقوط وروسته یې غوښتل چې تر وروستۍ شېبې پورې مقاومت وکړي او حتی «په دردناکه توګه ووژل شي» چې د طالبانو په وړاندې په ټول هېواد کې د پاڅون زمینه برابره شي.
ښاغلي مسعود له یوه امریکايي خبریال شان راین سره په خپله نوې مرکه کې چې (د چنګاښ په ۲۶مه) خپره شوه وویل، چې له سقوط وروسته یوازې یو ملي پاڅون کولای شوای افغانستان وژغوري او دغه پاڅون یو احساساتي لامل ته اړتیا درلوده.
هغه وويل: «زما لومړۍ تګلاره دا وه، چې په پنجشېر کې تر وروستۍ شېبې پورې جګړه وکړم، په دردناکه توګه مړ شم؛ تر څو له دې غميزې او قربانۍ سره خپل ولس ته د پاڅون دليل ورکړم.»
د مقاومت جبهې مشر وويل، چې دغې جبهې په تېر يو نيم کال کې يو تن غړی نه وژل شوی او نه هم د طالبانو له لوري نیول شوی او د طالبانو په وړاندې د دوى عمليات ډېر بريالي روان دي.
ښاغلي مسعود همداراز د طالبانو تر واک لاندې افغانستان سره د امریکا د مالي مرستو د خطرناکو پایلو خبرداری ورکړ.
هغه وويل، چې طالبانو د امريکا له مالي مرستو څخه د استفادې لپاره ٩٠٠ نا دولتي موسسې جوړې کړې دي.
د امریکا حکومت او نورو مرسته کوونکو هېوادونو ویلي، چې د دوی مالي مرستې چې په تېرو درېیو کلونو کې له دوه میلیاردو ډالرو ډېرې دي، د مرستندویه موسسو له لارې او یوازې د بشري اړتیاوو د پوره کولو لپاره شوې دي.
په همدې حال کې ملګرو ملتونو خبرداری ورکړی، چې له افغانستان سره نړۍوالې مرستې کمې شوې دي.
مسعود ادعا وکړه چې «طالبان د امریکایانو په پیسو جهادي مدرسي جوړوي.» دغه ډله توانیدلې چې «د نشهیي توکو له سوداګرۍ پرته د افغانستان له قانوني عایداتو څخه په کال کې شاوخوا دوه نیم میلیارده ډالره عاید ترلاسه کړي.»
هغه په افغانستان کې د بهرنیو جنګیالیو د شتهوالي په اړه هم خبرداری ورکړ.
د ملي مقاومت جبهې مشر وویل: «بهرني جنګیالي افغانستان ته راځي، روزنه ترلاسه کوي او بیا له افغانستانه وځي. موږ نه پوهېږو هغوی چېرې ځي.»
طالبانو په افغانستان کې د بهرنیو ملېشو شتهوالی رد کړی او ویلي یې دي، چې هېڅ ډلې ته به اجازه ورنه کړي چې له افغانستانه پر نورو هېوادونو بریدونه وکړي.
امریکايي رسنیو ویلي، چې واشنګټن له طالبانو سره د داعش پر وړاندې د مبارزې لپاره د یوه انتخاب په توګه پر همکارۍ غور کوي.
ځکه چې واشنګټن داعش د خپل امنیت لپاره لوی ګواښ ګڼي او طالبان هم د داعش د ځپلو لپاره اړینه انګیزه لري.
د دغې مرکې په یوه بله برخه کې ښاغلي مسعود همدارنګه ویلي، چې امریکا په دغه هېواد کې د نوموړي د حضور مخالفه ده.
هغه وویل: «زه فکر نه کوم، چې دوی (د امریکا حکومت) دې وغواړي چې زه امریکا ته لاړ شم. زه تر اوسه د دې شاهد نه یم، چې امریکا ما ته بلنه راکړي وي او یا دې هغوی زما د خبرو د اورېدو لېواله وي.»
