هند یو ځلې بیا د منځني ختیځ په اړه د ملګرو ملتونو د امنیت شورا په ناسته کې په غزه کې د سملاسي او بشپړ اوربند غوښتنه وکړه. په ملګرو ملتونو کې د هند مرستیال استازی ار رویندرا د یرغمل شویو بې قید و شرطه خوشې کولو په اړتیا ټینګار وکړ.
هغه د اسراییل او حماس ترمنځ په روانه جګړه کې د ملکي تلفاتوپه اړه اندېښنه څرګنده کړې.
هغه له دواړو خواو وغوښتل، چې په هر ډول شرایطو کې نړۍوال بشري قانون مراعت کړي.
ښاغلي رویندرا وویل:« موږ د غزې په تړانګه کې د سملاسي او بشپړ اوربند غوښتونکي یو. بشري مرستو ته د پراخ لاسرسي غوښتنه کوو. سربېره پردې، موږ د ټولو یرغمل شویو سملاسي بې له قیدو شرطه د خوشې کولو غوښتنه کوو.»
هند د اسراییل او فلسطین ترمنځ د روانې شخړې حل لپاره د قطر او مصر په څېر د هېوادونو د منځګړیتوب او هلوځلو ستاینه وکړه.
ښاغلي رویندرا د فلسطین لپاره د هند د پام وړ پرمختیایي مرستې ته هم اشاره وکړه، چې نږدې ۱۲۰ مېلیون ډالرو ته رسېږي.
له بل پلوه د غزې روغتیایي چارواکي وایي، چې غزه کې په تېرو ۲۴ ساعتونو کې لږ تر لږه ۸۱ فلسطینیان د اسراییل په بریدونو کې وژل شوي دي.
د فلسطین د روغتیا وزارت د شمېرو له مخې، د اکتوبر له اوومې راهیسې په غزه کې د اسراییل په جګړه کې لږ تر لږه ۳۸ زره او ۷۹۴ فلسطینیان وژل شوي او ۸۹ زره او ۳۶۹ نور ټپیان دي.
