د روسیې یوې محکمې یو امریکايي خبریال د جاسوسۍ په تور په ۱۶ کاله بند محکوم کړی دی. دغې محکمې د وال سټریټ ژورنال خبریال ایوان ګرشکوویچ تورن کړ، چې د روسیې د ټانک جوړولو د فابریکې په اړه یې معلومات راټولول.
ددې محکمې قاضي د جمعې په ورځ (د چنګاښ ۲۹مه) دستور ورکړ، چې د یاد خبریال مبایل او د یاداښت کتابچه یې له منځه یوړل شي.
ایوان ګرشکوویچ چې یو امریکایي وګړی دی، تېر کال د روسیې د امنیتي خدماتو د ادارې له خوا د دغه هېواد د ټانک جوړولو د فابریکې په اړه د معلوماتو د راټولولو په تور ونیول شو.
د امریکا ولسمشر جوبایډن د دغې محکمې د پرېکړې په غبرګون ویلي، چې ایوان ګرشکوویچ هېڅ کوم جرم نه دی کړی او په تېروتنې سره نیول شوی دی. نوموړي په یوې بیانیه کې ویلي، چې د دغه خبریال د ازادېدو لپاره جدي هڅه کوي.
وال سټریټ ژورنال هم د خپل خبریال محکومیت "شرمناک او جعلي" بللی دی.
د محکمې د حکم پر بنسټ دغه امریکايي خبریال باید د روسیې په تر ټولو خوندي او سخت زندان کې د ۱۶ کلونو بند سزا تېره کړي.
په دغه بندخونه کې په یوه شپه او ورځ کې ۱۶ ساعته کار کول، د روسيې د پروپاګند تکرار لیدل او د نورو بندیانو له خوا د بندیانو وهل عادي مسله ګڼل کېږي.
د روسیې د امنیتي خدماتو فدرالي ادارې اېوان ګرشکوویچ د مسکو د ختیځ په ۱۴۰۰ کیلومترۍ کې د یکاترینبورګ له ښار څخه نیولی و.
روسیې ویلي دي، چې دغه خبریال د امریکا د مرکزي اطلاعاتو د ادارې په امر د روسیې د ټانک جوړولو د یوې فابریکې په اړه معلومات راټولول.
د یادولو ده، چې په دې وروستیو کې په مسکو کې یوې محکمې یو بل امریکایي وګړی ټراویس لیک هم د نشه یي توکو د قاچاق په تور په دیارلس کاله بند محکوم کړ.
