د اسراییل لومړی وزیر بنیامین نتنیاهو د غزې سویل رفح ښار ته ولاړ او له اسراییلي ځواکونو سره یې وکتل. اسوشټیډ پرس د نتنیاهو له قوله راپور ورکړی؛ ددې لپاره چې اسراییل له مصر سره د غزې د پولییزو سیمو کنټرول په لاس کې ولري، دا سفر ضروري و.
د اسراییلو د لومړي وزیر دفتر له اسراییلي ځواکونو سره د نتنیاهو د کتلو انځورونه په خپل اېکس کې خپاره کړي دي.
د انځورونو پر بنسټ، بنیامین نتنیاهو زرهي واسکټ اغوستی دی او له اسراییلي ځواکونو سره یې د رفح ښار له ځینو برخو لیدنه کړې ده.
ښاغلي نتنیاهو واشنګټن ته د سفر او د امریکا کانګرس ته د وینا په درشل کې د فلسطین دغې جنګي سیمې ته تللی دی، څو د حماس پروړاندې خپله بریا وښيي.
د غزې له تړانګې څخه راپورونه ښيي، چې دغه سیمه د اسراییلو او حماس تر منځ په ۹ میاشتینیو جګړو کې سخته ویجاړه شوې ده.
په غزه کې د حماس د روغتیا وزارت د شمېرو له مخې، په دې سیمه کې د اسراییلو د بریدونو په پایله کې شاوخوا ۳۹ زره کسان وژل شوي او تر ۸۰ زره ډېر نور ټپیان شوي دي.
