د هند د اترپردیش په ګونډا کې د اور ګاډي اوښتو په پېښه کې درې کسه مړه او ۲۵ نور ټپیان دي. پېښه د موتي ګنج او جلاهي د اورګاډي تمځایونو ترمنځ شوې ده. د ټایمز اف اېنډیا د راپور له مخې، په سیمه کې د ژغورنې عملیات پیل شوي دي.
د پېښې په ځای کې ۴۰ کسیزه روغتیايي ډله او ۱۵ امبولانسونه ځای پر ځای شوي او نورې روغتیایي ډلې او امبولانسونه هم سیمې ته رسېدلي دي.
د اترپردېش وزیر اعلی یوګي ادیتیا نات چارواکو ته لارښوونه کړې، چې د مرستې او ژغورنې عملیات نور هم چټک کړي.
حکومت اعلان کړی، چې د مړو شویو کسانو کورنیو ته به لس لکه هندۍ کلدارې، او دوه نیم لکه به هغو کسانو ته ورکړل شي چې سخت ژوبل شوي او ۵۰ زره به هغه چا ته ورکول کېږي چې برسېرن ژوبل شوي وي.
