د پاکستان د بهرنیو چارو وزارت ویاندې ممتاز زهرا بلوڅ ویلي، افغان طالبان دې په پاکستان کې په ترهګريزو پېښو کې د ښکېلو کسانو پر وړاندې جدي ګام واخلي. هغې په خپلې اونیزې خبري ناسته کې ویلي، د حافظ ګل بهادر ډلې افغانستان کې پناه اخستې او په پاکستان کې په ترهګرۍ کې لاس لري.
نوموړې ویلي، چې پاکستان د بنو د برید په تړاو له افغانستان سره خپله اندېښنه شریکه کړې ده.
هغه وایي، د حافظ ګل بهادر ډله په دوامداره توګه د افغانستان خاوره د پاکستان پر ضد کاروي.
هغې د خپلې وینا پرمهال ویلي، ترهګریز فعالیتونه د دواړو هېوادونو دوه اړخیزو اړیکو او د پاکستان ټیکاو ته لوی ګواښ دی.
هغې زیاته کړې، چې د ترهګرۍ لپاره د افغانستان له خاورې ګټه اخیستل د نړۍ سولې ته هم ګواښ پېښوي.
د اغلې بلوڅ په وینا، پاکستان د ترهګرو ډلو او بریدګرو پر وړاندې له افغانستان سره استخباراتي معلومات شریک کړي دي.
هغې په لاهور كې د اسامه بن لادن د ملګري د نيولو په تړاو د پوښتنې له ځواب ورکولو ځان په څنګ تېر کړ.
د بنو اوسېدونکو له هغې وروسته په لاریون لاس پورې کړ، چې وړمه ورځ په دغې ولسوالۍ کې په یوه روغتیايي مرکز برید شوی و او له امله یې د ښځو او ماشومانو په ګدون اووه تنه وژل شوي وو.
لومړی د بنو ولسوالۍ زرګونه اعتراض کوونکو د بنو په ښار کې لاریون وکړ او له هغې وروسته یې د دغې ولسوالۍ په سپورټ کمپلېکس کې پرلت وواهه.
دغه برید هغه مهال وشو، چې پرلتوالو ته د تحریک انصاف ګوند غړي او د خیبر پښتونخوا د عامې روغتیا وزیر پښتونیار خان وینا کوله.
په سیمه کې ازاد خبریال رفعت الله ورکزي افغانستان انټرنشنل پښتو ته وویل، چې له دغه بریده ښاغلی پښتونیار روغ وتلی او په وینا یې چې په دغه برید کې یو کس ځای پر ځای وژل شوی او نږدې شل کسه نور ټپیان شوي دي.
په ټپیانو کې د ځینو هغو روغتیايي حالت د اندېښنې وړ ښودل شوی.
تر اوسه د دغه برید پړه کومې ډلې نه ده منلې؛ خو له هغه وروسته چې د پاکستان حکومت په یو شمېر قبایلي سیمو کې د عزم استحکام په نامه د پوځي عملیاتو د پیلېدا خبره کړې، نو ورسره هممهاله په دغو سیمو کې د دغو عملیاتو پر ضد اعتراضیه غونډې جوړې شوې او په ځینو سیمو کې خلکو د اعتراض په توګه پرلتونه هم وهلي دي.