په غزه کې روغتیایي سرچېنې وايي چې، د اسراییل د نویو بریدونو له امله لږ تر لږه ۷۰ تنه وژل شوي دي. د رویټرز د راپور له مخې، دغه کسان د زغرهوالو ګاډو او اسراییلي جنګي الوتکو په بریدونو کې د خان یونس په ختیځو سیمو او «بني سهیلا» کې وژل شوي دي.
د الجزیرې خبري شبکې په غزه کې د روغتونونو له قوله راپور ورکړی، چې د اسراییل په دغو بریدونو کې له ۲۰۰ ډېر کسان ټپیان شوي هم دي.
دغې شبکې دا رنګه ویلي، چې زغرهوالو ټانکونو، جنګي الوتکو او اسراییلي توپونو له هغه څو دقیقې وروسته دغه برید وکړ چې له خان یونس څخه د خلکو د کډه کېدلو لړۍ پیل شوې وه.
الجزیرې د فلسطیني سرچېنو له خولې راپور ورکړی، چې دغو بریدونو له څلور سوه زیاتو فلسطینیانو پر ژوند ناوړه اغیز پرې اېستی دی.
د بني سهیلا سیمې اوسېدونکو ویلي، چې اسراییلي ټانکونه شاوخوا دوه کیلو مټره دغه ښارګوټي ته د ننه شوي او د ډزو په کولو سره یې خلک اړ کړي چې له دغې سیمې وتیښتي.
د ابو خالد په نامه د سیمې یو تن اوسېدونکي رویټرز ته ویلي: «نن پر موږ د قیامت ورځ ده. خلک د بمباریو او ډزو له امله په تېښته کې دي. ډېر یې په سړکونو وژل شوي او ټپیان شوي دي.»
په غزه کې روغتیايي سرچېنو ویلي، چې پر دغه سیمه د اسراییل له بریدونو را په دې خوا ۳۹ زره کسه وژل شوي او شاوخوا ۹۰ زره نور ټپیان شوي دي.
