په پنسلوانیا کې په یوه ټاکنیزه غونډه کې د امریکا پر پخواني ولسمشر ډونلډ ټرمپ د وژلو له ناکامې هڅې دوه اوونۍ وروسته، د ایف بي ای مشر وایي، چې ټرامپ په مرمۍ او یا هم د مرمۍ په ټوټې ټپي شوی دی.
د ایف بي ای مشر کریسټوفر اې رې د چهارشنبې په ورځ (د زمري ۳مه) په کانګرس کې شاهدي ورکړه چې د جمهوري غوښتونکو کاندید د مرمۍ یا د مرمۍ په ټوټې ټپي شوی دی.
ایف بي ای د جمعې په ورځ ( د زمري ۵مه) وویل، چې ټرمپ په مرمۍ ویشتل شوی دی.
ایف بي ای د جمعې په ورځ په یوه اعلامیه کې وویل: «کوم څه چې د وژل شوي کس له ټوپک څخه د ټرامپ پر غوږ لږیدلې، مرمۍ وه یا هم د مرمۍ ټوټې.»
د وژنې له هڅې څو ساعته وروسته، ټرامپ وویل، چې په مرمۍ لګیدلی دی.
ټرامپ په ټولنیزو رسنیو کې لیکلې و، چې په مرمۍ لګیدلی او مرمۍ یې د ښي غوږ پاسنۍ برخه شکولې ده.
د ایف بي ای مشر د استازو مجلس د قضايي کمیټې په وړاندې شاهدي ورکړه، چې د ټرمپ د ټپي کیدو دقیق ماهیت روښانه نه و.
هغه زیاته کړه: «زه فکر کوم چې د هغه په اړه یوه پوښتنه موجوده ده هغه دا چې ایا مرمۍ یا د مرمۍ ټوټه د هغه په غوږ لګیدلې ده که نه.»
روني جکسون، د ټکزاس استازی او د سپینې ماڼۍ پخوانی ډاکټر چې د وژلو هڅې راهیسې یې د ټرمپ روغتیا څارلې، د رې په څرګندونو نیوکه وکړه او وې ویل: په بشپړ ډول هېڅ داسې شواهد شتون نه لري چې ښکاره کړي چې دا مرمۍ نه ده. کانګرس باید دا سند څنګه چې زما او د روغتون له خوا تایید شوی، تصحیح کړي.»
هغه زیاته کړه، رې تېروتنه کوي، چې وایي، چې مرمۍ په ټرامپ نه ده لګیدلې.
په دې اړه څیړنې روانې دي، چې څنګه یو شل کلن ځوان په دې وتوانید چې بام ته پورته شي او پر ټرمپ ډزې وکړي.
پر ټرمپ د چنګاښ په ۲۴مه د توماس میټیو کروکس په نوم د یو ځوان له خوا ډزې وشوې چې ټرامپ ترې روغ ووتلو.
