د سه شنبې په ورځ د کېرالا د ویاناډ ولسوالۍ په غرنیو سیمو کې د ځمکې ښویېدنې له امله ۱۹ کسان مړه شوي دي. ورته مهال د هند لومړي وزیر نرېندرا مودي په ویاناډ کې د ځمکې ښویېدنې وروسته د کېرالا حکومت ته له مرکزه د هر ډول ممکنه مرستې ډاډ ورکړی.
هغه په اېکس پاڼه لیکلي، د ویاناډ په ځینو برخو کې د ځمکې ښویېدنې له امله ګڼ خلک زیانمن شوي دي.
هغه وړاندې کاږلي:« د ټولو هغو کسانو لپاره اندېښمن یو، چې په دغه پېښه کې یې خپل عزیزان له لاسه ورکړي دي.»
هغه وایي، په سیمه کې د ژغورنې عملیات روان دي.
د راپورونو له مخې، د مړو شویو کسانو شمېره ښایي ډېره لوړه شي؛ خو لا هم تر خاورو لاندې سلګونه بند پاتې کسان نه دي را اېستل شوي.
د ځمکې ښویېدنې ترڅنګ په سیمه کې د سېلابونو راوتو راپورونه هم ورکړل شوي دي.
