رویټرز راپور ورکړی، چې د ډونالډ ټرمپ ټاکنیز کمپاین په شپږو ایالتونو کې د کماله هرېس د محبوبیت او شهرت پر ضد پر اعلاناتو ۱۰ مېلیونه ډالر لګوي. دغه شپږ ایالتونه د ټرمپ او هرېس تر منځ د ټاکنیزې سیالۍ اصلي ډګر ګڼل کېږي.
رویټرز د دوشنبې په ورځ د (زمري ۸مه) راپور ورکړ، چې د ټرمپ ټاکنیز کمپاین تر ډېره پر اعلانونو زور زیات کړی چې "د هغه د ډیموکراتیکې سیالې کماله هرېس لپاره د رایې ورکوونکو د لېوالتیا د زیاتوالي مخه پرې ونیسي."
دا په تېرو اتو میاشتو کې د ټرمپ د ټاکنیزو کمپاینونو ترټولو لوی لګښت ګڼل کېږي.
پنسلوانیا، ویسکانسن، نیواډا، میشیګان، جورجیا او اریزونا هغه شپږ ایالتونه دي چې د ډیموکراټ او جمهوري غوښتونکو ګوندونو ترمنځ د رایې ورکوونکو رایې بدلېږي او ټرمپ د دې ایالتونو د رایې ورکوونکو په ذهنونو کې د خپلې سیالې کماله هرېس د محبوبیت د منځه وړلو لپاره په اعلاناتو پیسې مصرفوي.
د دوشنبې په ورځ (د زمري په ۸مه) ټرمپ د کماله هرېس د ویناوو او مرکو یو ویډیو کلیپ د هغه په شخصي خواله رسنیو کې چې خپله د ټرمپ له لوري جوړ شوی خپور کړ، هڅه یې وکړه چې هغه د "ډېرې افراطي لېبرالې او د امریکایانو سره د اړیکو څخه بهر" انځور کړي.
له بلې خوا، کماله هرېس تر دې دمه د نیویارک په یوه محکمه کې د ټرمپ جنایي قضیو په ځانګړي ډول د مالي فساد پر قضیې تمرکز کړی او هڅه کوي، چې ټرمپ د جمهوري غوښتونکو تر کنټرول لاندې ایالتونو کې د جنین سقط ضد اقداماتو مسؤل وګڼي.
له ټاکنو څخه د جوبایډن له پر شا کېدو وروسته تېره یکشنبه کماله هرېس د ډیموکراټ ګوند له لوري د امریکا د ولسمشریزو ټاکنو لپاره د ډونالډ ټرمپ سیاله وټاکل شوه.
د څارونکو په اند، مېرمن هرېس د ډیموکراټ ګوند ټاکنیز کمپاین ته نوې ساه ورکړې ده.
