په برېتانیا کې د افغانستان سفیر زلمي رسول افغانستان انټرنشنل ته ویلي، چې دغه سفارت له وقفې پرته خپلې ټولې کونسلي چارې پر مخ وړي. د طالبانو د بهرنیو چارو وزارت نن وویل، چې د افغانستان ۱۴ سیاسي او کونسلي استازولۍ له دې وزارت سره له همغږۍ پرته په خپل سري توګه اقدام کوي.
زلمي رسول په خپل اېکس کې هم لیکلي: «د افغانستان سفارت په لندن کې په قاطعیت سره اعلان کوي، چې ټولې کونسلي او ډېپلوماټیک خدمتونه پرته له هیڅ ډول وقفې دوام لري او همدارنګه په برېتانیا او د ایرلنډ جمهوریت کې د مېشتو افغانانو لپاره د خدماتو وړاندې کولو ته ژمن پاتې کیږي.»
په لندن کې د افغانستان سفارت د طالبانو د وروستي اقدام په اړه یوه اطلاعیه هم خپره کړې ده.
دې سفارت ویلي، چې چارې یې د پخوا په شان روانې دي.
په اطلاعیه کې راغلي، چې دا سفارت له هېواد څخه بهر د ټولو افغانانو د حقونو او ګټو پر اساس ژمن دی، چې خدمات وړاندې کړي.
طالبانو ویلي، چې په یو شمېر اروپایي هېوادونو کې د افغانستان د سیاسي استازولیو له خوا د هر ډول اسنادونو د اجرا پر وړاندې هېڅ ډول مسوولیت نه لري.
د طالبانو د بهرنیو چارو وزارت ویلي، چې تر دې وروسته په اروپایي هېوادونو کې د افغانستان د ۱۴ سیاسي او کونسلي استازولیو د اقداماتو پر وړاندې مسوولیت نه اخلي.
د دغه وزارت د اعلان پر بنسټ؛ په لندن، بلجیم، برلین، بن، سویس، اتریش، فرانسه، ایټالیا، یونان، پولنډ، سویډن، ناروې، کاناډا او اسټرالیا کې د افغانستان استازولیو په کابل کې له دې وزارت سره له همغږۍ څخه ډډه کړې ده.
