پاکستانۍ ورځپاڼه: په تېرو لسو میاشتو کې ۵ زره افغانان د برېتانیا پوځي اډو ته لېږدول شوي
پاکستانۍ ورځپاڼې نشنل راپور ورکړی، چې په تېرو ۱۰ میاشتو کې د سلګونو پخوانیو پوځیانو په ګډون ۵ زره افغانان په پټه له افغانستانه د برېتانیا پوځي اډو ته لېږدول شوي.
پاکستانۍ ورځپاڼې نشنل راپور ورکړی، چې په تېرو ۱۰ میاشتو کې د سلګونو پخوانیو پوځیانو په ګډون ۵ زره افغانان په پټه له افغانستانه د برېتانیا پوځي اډو ته لېږدول شوي.
د دغه راپور له مخې؛ تر اوسه څه باندې زر تنه د طالبانو له خوا د صادر شوي پاسپورټ لرونکي کسان د پاکستان له لارې تللي دي.
دغې رسنۍ د چهارشنبې په ورځ (د زمري ۱۰مه) نېټه د باخبرو سرچینو په حواله خبر ورکړ، چې په ایستل شویو کسانو کې ۱۵۶ افغانان او د هغوی کورنۍ هم شاملې دي، چې د برېتانیا د استخباراتي ادارو سره یې کار کاوه.
دا راپور ټینګار کوي، چې ډیری افغانان لاهم د طالبانو لخوا د تعقیب او وژل کېدو له خطر سره مخ دي.
د لېږد دغو عملياتو ماموريت ته د برېتانيا د دفاع وزارت له لوري «لازوريټ» رمزي نوم ورکول شوی دی
دې عملیاتو ته یوې نږدې سرچینې نشنل ته وویل: «موږ د افغانان د ایستلو په حال کې يو، ځینې یې د ویلو لپاره ټکان ورکوونکي کیسې لري.»
خو یوه بله سرچینه بیا ادعا کوي، چې یو شمېر هغو افغانانو برېتانیا ته د تګ اجازه ترلاسه کړې، چې یوازې څو ورځي يې په هلمند ولایت کې د ځانګړو عملیاتو په ترڅ کې د دغه هېواد ځواکونو ته خدمت کړی دی.
پر افغانسان د طالبانو دبیا واکمنېدو وروسته برېتانیا هغه ۲۷ زره افغانان، چي د طالبانو له ګواښ، شکنجې او بند سره مخ وه د بیا مېشتېدو په پروګرام کې شامل کړي دي
هغه کورنۍ چې له افغانستان څخه په ځانګړو الوتنو یا ملکي الوتکو کې برېتانیا ته ځي، دوی ژر تر ژر د طبي معاينې لپاره د پروسس مرکزونو ته لېږدول کيږي او بيا ځای پر ځای کيږي.
