د امریکا دفاع وزیر د ایران بریدونو پر وړاندې له اسراییله پر خپل ملاتړ ټینګار وکړ

لويډ اسټین د حماس او حزب الله د دوو مهمو څېرو له وژل کېدو وروسته د اسراييل د دفاع له وزير يواو ګالنټ سره په خبرو کې دا موضوع راپورته کړه.
ښاغلي اسټین د پنجشنبې په ورځ (د زمري ۱۱مه) پر خپلې اېکس پانې لیکلي، چې له ښاغلي ګالنټ سره یې د بیروت په څنډه کې د اسراییل د برید او د لبنان د حزب الله د لوړ پوړي قوماندان او د حسن نصرالله د سلاکار فواد شکر د وژل کېدو په اړه خبرې کړې دي.
نوموړي په تهران کې د اسماعیل هنیه د وژل کېدو په اړه څه ونه ویل؛ خو لیکلي یې دي: «ما د اسراییل د امنیت او د ایران له ملاتړه برخمنو ترهګرو ډلو د ګواښونو پر وړاندې د دفاع حق ته په خپله ژمنتیا ټینګار وکړ.»
د امریکا د دفاع وزیر همدارنګه د اسراییل او لبنان ترمنځ د پولې د کړکېچ د له منځه وړلو لپاره د ډیپلوماټیکو حل لارو څخه خپل ملاتړ اعلان کړ، چې د دواړو هېوادونو وګړي خپلو کورونو ته ستانه شي.
د امریکا د دفاع وزیر د حماس د سیاسي دفتر د مشر اسماعیل هنیه او د لبنان د حزب الله د پوځي قومندان فواد شکر له وژل کېدو وروسته د اسراییل د امنیت د ملاتړ لپاره د خپل هېواد ژمنه اعلان کړه.
اسراییل د سه شنبې په ورځ د (زمري ۹مه) اعلان وکړ، چې فواد شکر یې د لبنان د پلازمینې بیروت په څنډه کې په یوه هوایي برید کې وژلی دی.
حزب الله د چهارشنبې په ورځ د هغه مړینه تایید کړه.
د فواد شکر له وژل کېدو څو ساعتونه وروسته د حماس د سیاسي دفتر مشر اسماعیل هنیه په تهران کې ووژل شو.
حماس وايي، چې د هنیه وژنه د اسراییل کار و؛ خو اسراییل تر اوسه په رسمي ډول د هغه د وژنې مسوولیت نه دی منلی.

د حزب الله او حماس د دغو دوو مهمو کسانو له وژل کېدو وروسته ایران، حماس او حزب الله اعلان کړی چې د هغوی غچ به اخلي.