د اسراییل د لومړي وزیر بنیامین نتنیاهو دفتر د جمعې په ورځ وویل، چې یو اسراییلي پلاوی به په راتلونکو ورځو کې د غزې د اوربند او د یرغمل شویو بندیانو د خلاصون په اړه د خبرو اترو لپاره قاهرې ته سفر وکړي.
د هغه دفتر وویل:« د یرغمل شویو کسانو د خلاصون لپاره مذاکره کوونکې ډله به د شنبې په شپه یا د یکشنبې په ورځ قاهرې ته لاړه شي.»
بلخوا د حماس یوه جګپوړي چارواکي سامي ابو زهري رویټرز خبري اژانس ته ویلي:« نتنیاهو نه غواړي، چې جګړه ودروي او د خپلو جنایتونو د پټولو او له پایلو څخه د تېښتې لپاره هسې تشې څرګندونې کاروي.»
دغه څرګندونې وروسته له هغه رابرسېره کېږي، چې همدا وړمه ورځ د امریکا ولسمشر جوبایډن ویلي و، چې د اسماعیل هنیه وژل به په غزه کې د اوربند خبرې زیانمنې کړي.
هغه خبریالانو سره په خبرو کې ویلي و، چې په منځني ختیځ کې د زیاتېدونکي کړکېچ په اړه سخت اندېښمن دی.
د امریکا ولسمشر وویل، چې د اسراییل له لومړي وزیر سره یې مستقیمې خبرې وکړې او له نتنیاهو یې وغوښتل چې د یرغمل شویو بندیانو د خوشې کولو او په غزه کې د اوربند د هوکړې لپاره دې خبرې پیل کړي.
