د فاریاب - جوزجان په لویه لار د خان چارباغ په ولسوالۍ کې د یوې ترافیکي پېښې له امله د ښځو په ګډون ۹ کسانو خپل ژوند له لاسه ورکړی. د فاریاب ولایت سیمه ییزو چارواکو له رسنیو سره په خبرو کې ویلي، چې په دې پېښه د درېو ښځو په ګډون ۹ کسان وژل شوي او د یوې ښځې په ګډون درې نور ټپيان دي.
د مسوولانو په وینا، پېښه نن له غرمې مخکې هغه مهال وشوه، چې یو سراچه موټر له کرولا ډوله موټر سره ټکر وکړ.
د راپورونو له مخې، د پېښې ټپيان د اندخوی ولسوالۍ سیمه ییز روغتون ته لېږدول شوي دي.
دا په داسې حال کې ده، چې په تېرو دوو ورځو کې بیا په کاپیسا او بامیان ولایتونو کې هم د جلا جلا ترافیکو پېښو له امله پنځلسو کسانو ته مرګژوبله اوښتې ده.
که څه هم طالبانو په وار وار له موټر چلوونکو غوښتي، چې د ترافیکي پېښو د مخنیوي لپاره ترافیکي قوانین په پام کې ونیسي، خو په لویو لارو کې موټر چلوونکي بیا د سړکونو خرابوالی، د ترافیکي نښو نه شتون او د یو شمېر موټر چلوونکو له خوا د ترافیکي اصولو نه په پام کې نیول د خونړیو پېښو لاملونه بولي.
