د طالبانو د لوړو زدهکړو وزارت په غور ولایت کې د هغو ۹۱۳ طالبانو د ازموینې پایلې اعلان کړې چې د «طالبانو او فضلانو» په ازموینه کې یې برخه اخیستې وه. د رتبو د جدول پر بنسټ دغه طالبان په مخکښ، لوړې، منځنۍ او وړ درجې فارغ شوي چې سندونه به ترلاسه کوي.
د دغه جدول پر بنسټ، چې یوه کاپي یې افغانستان انټرنشنل ته لیږل شوې ده، په دې ازموینه کې ۹۱۳ تنه زده کوونکي چې ټول یې نارینه دي، بریالي شوي دي. چې مخکښ کس په کې په۹۷ نمرو، او ښکته بیا په وړ درجې سره ۵۸ نمرو بریالي شوي.
د لوړو زدهکړو وزارت د ۱۳ ولایتونو د دیني مدرسو د منځنۍ او لوړې درجې له طالبانو او فاضلانو څخه ازموینه واخیسته.
په دې ازموينه کې ١٣زره طالبانو او فاضلانو نوم ليکنه کړې وه او هغو کسانو ته چې «معياري نمرې» يې ترلاسه کړې وې، تحصيلي سندونه به ورکړل شي.
د غور ولایت د فاضلانو ازموینه د غبرګولي په ۱۸مه د «لوړو زدهکړو وزارت د پوهنتونونو او تخصصونو د عمومي ریاست» له خوا د طالبانو د علمي کچې د ارزونې په موخه واخیستل شوه.
دغو طالبانو د خپلو دیني درسونو پر بنسټ ازموینه ورکړې او په بدل کې ورته د معاصر لوړو زده کړو په سیستم کې سندونه ورکړل کیږي چې د هغه پر بنسټ به د محکمو په ګډون د طالبانو په دولتي ادارو کې وګومارل شي.
د طالبانو د لوړو زدهکړو وزارت ویلي دي چې مخکښو بریالیو فارغانو ته به د لیسانس او ماسټرۍ سندونه ورکړل شي.
د غبرګولي په ۱۸ طالبانو په غور ولایت کې د ۱۳۵۰ طالبانو لپاره د عالمیه دورې ازموینه واخیسته، چې هغوی ته به له بریالیتوب او تېزیس له دفاع وروسته د ماسټرۍ سند ورکول کېږي.
