د الجزیرې د راپور له مخې، په غزه کې په تېرو ۲۴ ساعتونو کې د اسراییل په بریدونو کې ۴۰ تنه وژل شوي او ۷۱ نور ټپیان دي. په همدې حال کې اسراییل د شاوخوا ۹۰ نامعلومو فلسطینیانو جسدونه چې د دوی د پوځ لهخوا نیول شوي وو، له څو میاشتو وروسته بېرته راګرځولي دي.
د راپورونو له مخې، اسراييلي پوځ په لوېديځه غاړه کې ۵ فلسطينيان نيولي دي.
ورته مهال اسراییل د لبنان په سوېل کې هم هوايي بریدونه کړي، چې په پایله کې یې دوه تنه وژل شوي دي.
له بلې خوا د ایران د بهرنیو چارو وزارت وايي، ایران نه غواړي چې په سیمه کې کړکېچ زیات شي؛ خو د سیمې له بې ثباتۍ څخه د ژغورلو لپاره اسراییل ته سزا ورکول اړین دي.
دا رنګه د بښنې نړۍوال سازمان پر اېکس پاڼه لیکلي، چې په غزه کې هیڅ ځای خوندي نه دی.
دغه سازمان وایي، د ټولو خواوو لهخوا سملاسي او دوامداره اوربند د دې ټولو کړاوونو او زیانونو د پای ته رسولو یوازینۍ او ګټوره لار ده.
