د شپږیزې نهم پړاو کرېکټ سیالۍ د دوشنبې په ورځ پیلېږي
د شپږیزې نهم پړاو کرېکټ سیالۍ د دوشنبې په ورځ په کابل کې پیلېږي. د دغو سیالیو لپاره د لوبډلو د چمتووالي تمرینات تېره ورځ د امو نهنګانو لوبډلې لهخوا پیل شول.
د شپږیزې نهم پړاو کرېکټ سیالۍ د دوشنبې په ورځ په کابل کې پیلېږي. د دغو سیالیو لپاره د لوبډلو د چمتووالي تمرینات تېره ورځ د امو نهنګانو لوبډلې لهخوا پیل شول.
د لوبو تر پیله به هره لوبډله د چمتوالي دغه تمرینات ترسره کوي.
په دغو سیالیو کې به پنځه لوبډلې د یو بل پر وړاندې ولوبېږي.
دغه سیالۍ د اګسټ میاشتې په ۱۲مه پیلېږي او د همدې میاشتې تر ۲۵مې نېټې به دوام وکړي.د دغو سیالیو لومړۍ لوبه د سپين غر او بند امير لوبډلو ترمنځ ده.په دغو سیالیو کې به ټولې ۲۱ لوبې ترسره شي.
د ملګرو ملتونو کارپوهانو د المپیک له نړۍوالې کمېټې وغوښتل، چې د افغان ښځینه لوغاړو ملاتړ دې وکړي او هغوی ته دې اسانتیاوې برابرې کړي.
دوی له ورزشي سازمانونو وغوښتل، چې په سپورټي لوبو کې د ښځو پر ګډون دې د طالبانو د بندیزونو پر وړاندې اقدام وکړي.
د ملګرو ملتونو کارپوهانو وویل، چې د طالبانو له خوا د ښځو پر سپورټ بندیز د دوی له حقونو څخه سرغړونه ده او بل هېڅ هېواد دا ډول اقدام نه دی کړی.
د ملګرو ملتونو کارپوهانو په ګډون د افغانستان لپاره د بشري حقونو د سازمان مشر ریچارډ بنټ، د جمعې په ورځ په یوه اعلامیه کې لیکلي، چې د ښځو او نجونو د سپورټ په وړاندې د طالبانو کړنې د ښځو پر وړاندې د دې ډلې د تبعیضي او ظالمانه برخورد یوه برخه ده، چې د بشریت پر وړاندې د جنایت یوه بیلګه کیدای شي.
شاوخوا درې کاله کېږي، چې د طالبانو تر واک لاندې په افغانستان کې ښځې او نجونې له خپلو ډېرو حقونو بې برخې دي. د کار او زده کړې له حق څخه نیولې تر سپورتي لوبو کې ګډون او پارکونو ته تګ او د کورنۍ له نارینه غړي پرته سفر کول.
د پاریس د المپیک په سږنیو سیالیو کې د افغانستان په استازیتوب درې ښځینه او درې نارینه ورزشکارانو برخه اخیستې ده. خو طالبانو ویلي، چې دغه ډله د المپیک په سیالیو کې افغان ښځینه ورزشکارانې په رسمیت نه پیژني.
د ملګرو ملتونو استازو دا هم ویلي، چې د سپورټ په ګډون د افغان مېرمنو او نجونو له حقونو او کرامت څخه ناوړه محرومیت باید پای ته ورسیږي.
په خپره شوې اعلامیه کې ټینګار شوی: «کولتور باید د بشري حقونو څخه د سرغړونې لپاره د عذر په توګه ونه کارول شي، لکه په سپورټ کې د ګډون حق.»
د ملګرو ملتونو کارپوهانو ویلي، چې د سپورټ نړۍوال سازمانونه مسوولیت لري چې د طالبانو له "جابرانه" سیاستونو سره مبارزه وکړي او په هر ځای کې د افغان ښځینه ورزشکارانو ملاتړ وکړي.
دوی په دغو سیالیو کې د افغان ښځینه ورزشکارانو د ګډون لپاره د المپیک د نړۍوالې کمېټې ملاتړ «ښه» وباله، خو ټینګار یې وکړ، چې لا زیات ملاتړ ته اړتیا ده.
دغو کارپوهانو ویلي< چې د سپورټ نړۍوال سازمانونه باید له هر هغه اقدام څخه ډډه وکړي چې د طالبانو له تبعیضي او غیر قانوني تګلارو سره د تړاو په توګه تعبیر شي.
د افغانستان د واليبال په ملي لوبډله کې د داخلي جنجالونو او تر هغه وروسته، چې د لوبډلې يو شمېر لوبغاړو ته بلنه ور نه کړل شوه اوس طالبانو د واليبال پر فدراسيون فشارونه زيات کړي دي. طالبانو د واليبال ملي نوي ايراني مشر روزونکي ته ځيني لوبغاړي معرفي کړي دي.
افغانستان انټرنشنل ته سرچينو ويلي، چې دغه فشارونه تر ډېره د حقاني شبکې له خوا ترسره شوي دي.
په دې وروستیو کې د افغانستان د والیبال ملي لوبډلې هغو لوبغاړو، چې بلنه نه ده ورکړل شوې د دې موضوع په وړاندي اعتراضونه کړي او د دې لوبډلې د مشر روزونکي د استعفا غوښتنه یې کړې ده.
په تېرو څو ورځو کې د والیبال فدراسیون مشرتابه پلاوي د طالبانو د بدني روزنې له مشر احمدالله وثیق سره هم کتلي او خبرې یې ورسره وکړي دي.
واليبال فدراسيون او د بدنې روزنې ادارې د دې ناستې جزيیات نه دي شريک کړي.
د هند د غېږ نیونې په تاریخ کې د دغه هېواد لوبغاړې ونیش پوګاټ لومړنۍ غېږنیوونکې شوه چې د اولمپیک سیالیو پایلوبې ته وځي. مېرمن پوګاټ پرون د فرانسې مرکز پاریس کې پرون د اولمپیک لوبو د غېږنیونې نیمه پایلوبه کې د کیوبا لوبغاړې ته د ۵ د صفر په مقابل کې ماتې ور کولو سره دا ویاړ وګاټه
ونیش پوګاټ دې بري سره د ځان لپاره د سیلورو مډال یقیني کړل او هم لومړنۍ هندۍ شوه چې د اولمپیک پایلوبې ته وځي.
مېرمن پوګاټ د غېږنیونې فدراسیون د مشرانو پرضد د مظاهرو او پر هغوی د لوبغاړو د جنسي ځورولو د تور له امله هم مشهوره ده.
ونیش پوګاټ او بجرنګ پونیا نږدې یو نیم کال مخکې د هغو سلو لوبغاړو مشري کوله چې د دغه فدراسیون د مشر د لرې کولو لپاره یې د هند د پارلمان مخ ته یې اعتراض کړی و.
ونیش پوګاټ تر دې مخکې د همګټو هېوادونو د غېږنونې سیالیو کې درې ځلې د سرو مډالونه ګټلي دي.
د پاکستان کرېکټ بورډ له بنګلدېش سره د څلورو ټېسټ لوبو لپاره د شاهينز په نوم ۱۷ کسيزه لوبډله اعلان کړه. کرېکټ بورډ ويلي، چې دغه سيالې به د اګسټ له ۲۱ شروع او د سپتمبر تر ۳مې به دوام وکړي.
بورډ زياتوي، چې له بنګلدېش سره دغه سيالۍ به د پاکستان په کوربتوب په راولپنډۍ او کراچۍ کې وشي.
د پاکستان کرېکټ بورډ د شان مسعود په لوبډلمشرۍ او د سعود شکيل په مرستيالۍ دغه لوبډله اعلان کړې.
په دې لوبډله کې عامر جمال، عبدالله شفیق، ابرار احمد، بابر اعظم، کامران غلام، خرم شهزاد، میر حمزه، محمد علي، محمد حریره، محمد رضوان، نسیم شاه، سيام ایوب، سلمان علي اغا، سرفراز احمد او شاهین شاه افریدي شامل دي.
پاکستان کرېکټ بورډ ويلي، چې لوبډله به یې د اګسټ په ۱۱مه په راولپنډۍ کې تمرين شروع کړي او بنګلدېش لوبډله به د اګسټ په ۱۷ نېټه اسلام اباد ته ورسيږي.
د پاکستان لومړي وزير په لاهور کې د قذافي لوبغالي د بیارغونې په مراسمو کې د دغه هېواد له کرېکټ بورډ څخه غوښتي، چې په ملي لوبډله کې دې اصلاحات راوستل شي. شهباز شريف ټينګار کړی، چې ملي لوبډلې ته دې د وړتيا له مخې لوبغاړي غوره شي.
پاکستاني رسنيو خبر ورکړی، چې لومړي وزير شهباز شريف د پاکستان له کرېکټ بورډ سره هم ژمنه کړې، چې د کرېکټ لوبغالي به په عصري ډول جوړوي.
نوموړي په لاهور کې د قذافي لوبغالي د عصري جوړېدو پر مهال د دغه هېواد د کرېکټ ملي لوبډلې ته په اشارې ويلي: « ملي لوبډلې ته د وړتيا به اساس لوبغاړي وټاکئ، سمون په کې راولئ، که لومړۍ وزير هم د لوبغاړو د انتخاب دا درته ووايي مه یې منئ او وړتيا په نظر کې ونيسئ.»
لومړي وزير د پاکستان له کرېکټ بورډ څخه په جدي ډول غوښتننه کړې، چې ملي لوبډلې ته بايد پاملره زياته کړي.
په دې وروستيو کې د پاکستان ملي لوبډله ښې پايلي نه دي ورکړي او د هرې لوبې تر ماتې وروسته د پاکستاني رسنيو او مينه والو له سخت غبرګون سره مخ شوي.
پاکستان ملي لوبډله په تېرو ۲۰ او ۵۰ اوره نړيوالو جامونو کې د تمي خلاف له پرله پسې ماتو وروسته له سختو انتقادونو سره مخ شول.
