د بریټانیا د بهرنیو چارو وزیر په خپله اېکس پاڼه د یو پیغام په خپرولو سره له خپلو خلکو غوښتي، چې له لبنانه دې ووځي. ډیوید لمي لیکلي: «په لبنان کې بریټانوي وګړو ته زما پیغام روښانه دی. همدا اوس ووځئ.»
هغه ویلي، چې په منځني ختیځ کې د تاوتریخوالي زیاتوالی د هیچا په ګټه نه دی.
ډیوید لمي دا رنګه ویلي، چې بریټانیا د تاوتریخوالي د کمولو لپاره له ټولو ډیپلوماټیکو لارو څخه خپلو هلو ځلو ته دوام ورکوي.
په تهران کې د اسماعیل هنیه تر وژنې وروسته ایران له اسراییله د غچ اخیستنې ګواښ کړی.
په سیمه کې د ایران ملاتړي حزب الله ګوند هم په دې وروستیو کې ویلي، که ایران له خپل دریځه په شا هم شي؛ نو دوی چمتو دي چې پر اسراییل برید وکړي.
خو د سپاه باسداران د عمومي قوماندان ځای ناستي علي فدوي ویلي، د ایران د مشر علي خامنهیي د سپارښتنې سره سم به د اسماعیل هنیه د وژلو غچ اخلي.
په تهران کې د اسماعیل هنیه تر وژنې وروسته، خامنهیي په خپل پیغام کې ویلي و، چې اسراییل «په دغه کار سره ځانته د سختې سزا زمینه برابره کړه، موږ خپله دنده ګڼو د هغه د وینې غچ چې په ایران کې شهید کړل شو حتمي اخلو.»
