د افغانستان انټرنشنل - پښتو د څېړنیز راپور پر بنسټ د پخواني جمهوریت د ملي امنیت ادارې ۹۰۵۱ استخباراتي کارکوونکي، سرتېري او د ملي امنیت په مرسته پاڅون کوونکي وژل شوي، ۱۱۳۷۱ ټپیان شوي او ۳۱۷ کسان معلول شوي دي.
په وژل شویو کې یې درې جنرالان، ۹۸ ډګروالان، ۲۳۱ ډګرمنان او پاتې تورن او د نورو رتبو خاوندان او امنیتي همکاران وژل شوي دي.
راپور زیاتوي، چې که څه هم د افغانستان د ملي امنیت لوی ریاست د مرګ ژوبلې په اړه بهرنیو ادارو او یا کورنیو غیردولتي سازمانونو ځانګړې شمېرې نه دي وړاندې کړي؛ خو یوازینۍ شمېرې چې موږ یې په لاس کې لرو هغه د ملي امنیت ریاست اړوند د مرګ ژوبلې هغه راپور دی، چې د ملي امنیت شورا د توحید مرکز ته استول شوی دی.
د افغانستان د پخواني جمهوري دولت د ملي امنیت د ۲۰۲۱ کال د جنوري د میاشتې د راپور په اساس په افغانستان کې د ملي امنیت د کارکوونکو، سرتېرو او پاڅون کوونکو په ګډون ۹۰۵۱ اوپراتیفي همکاران وژل شوي دي.
دغه شمېرې په لاندې ډول شرحه کولی شو:
د ملي امنیت رسمي کارکوونکي: ۲۴۲۶ وژل شوي او ۳۸۲۱ ټپیان شوي دي
د ملي امنیت سرتېري: ۲۶۷۱ وژل شوي او ۳۱۹۳ ټپیان شوي دي
پاڅون کوونکي او اپراتیفي همکاران: ۳۹۵۴ وژل شوي ۴۳۵۷ ټپیان شوي دي
که څه هم د ملي امنیت ادارې د اوپراتیفي همکارانو او پاڅون کوونکو شمېر په دقیق ډول نه دی روښانه؛ خو د چارو ادارې د دفاع او امنیت ریاست په ۲۰۲۰ کال کې په یوه سند کې له نهو زرو څخه د پورته امنيتي همکارانو د مرګ ژوبلې راپور ورکړی دی.
د افغانستان انټرنشنل - پښتو ځانګړی څېړنیز راپور دلته ولولئ:
د افغانستان د شل کلنې جګړې د ښکېلو اړخونو مرګ ژوبله (۲۰۰۱-۲۰۲۱)
