د امریکا د بهرنیو چارو وزارت ویلي، چې په افغانستان کې د وسلهوالې جګړې ملاتړ نه کوي. د دغه وزارت یو ویاند فاکس نیوز ته ویلي، په افغانستان کې ۴۴ کاله جګړه تېره شوې او امریکا نه غواړي چې یو ځلې بیا په دغه هېواد کې جګړه توده شي.
هغه ټینګار کړی، چې په خپله افغانان هم نور د جګړې دوام نه غواړي.
خو په همدې حال کې د امریکا د استازو په جرګه کې د بهرنیو اړیکو د جرګهګۍ مشر ویلي، چې د طالبانو پر ضد د ملي مقاومت د جبهې ملاتړ کوي.
مایکل مکال ویلي، چې ډېر ژر به د دغې جبهې له مشر احمد مسعود سره وویني.
د ملي مقاومت د جبهې د بهرنیو اړیکو مشر علي میثم نظري چې امریکا ته تللی، له هغه هېواده یې غوښتي چې د طالبانو پر ضد مبارزه کې دې امریکا د دوی څخه ملاتړ وکړي.
نوموړي فاکس نیوز ته ویلي:« موږ په دې باور یو، چې که زموږ څخه په کمه کچه هم ملاتړ وشي؛ نو کولای شو، چې په افغانستان کې د ترهګرۍ جرړلې وباسو.»
نظري دا رنګه ویلي، چې د ملي مقاومت جبهې ځواکونه د افغانستان د پخواني امنیتي ځواکونو برخه ده چې په تېرو ۲۰ کالو کې د نړۍوالو او امریکايي ځواکونو لهخوا د ترهګرۍ پر وړاندې روزل شوې ده.
هغه زیاته کړه:« موږ داسې ځواکمن کسان لرو، چې کولای شي د ترهګرو په وړاندې وجنګېږي او دا کار موږ په تېرو درېیو کالو کې پرته له هر ډول ملاتړ څخه ترسره کړی دی.»
فاکس نیوز د شنبې په ورځ لیکلي، چې د بېلابېلو نړۍوالو کړکېچونو او په امریکا کې د ولسمشرۍ د لانجمنو ټاکنو په رانږدې کېدو سره، داسې نه ښکاري چې د امریکا دولت دې له افغانستانه د خپلو ځواکونو د وتلو درې کاله وروسته هم د هغه هېواد د وضعیت په اړه بحث کولو ته لېواله وي.
د فاکس نیوز شبکې دا رنګه ویلي، چې لا هم د امریکا او لویدیځوالو لهخوا د طالبانو په وړاندې د مقاومت خبره له پامه غورځول شوې ده.
تېر کال د بریټانیا د بهرنیو چارو وزارت ویلي و، چې د طالبانو د واکمنۍ په رانسکورولو کې له تاوتریخوالي او جګړې څخه ملاتړ نه کوي او دا د افغانستان په ګټه هم نه بولي.
بریټانیا ویلي و، چې د طالبانو له ادارې سره پرته له عملي تعامل څخه بله لار نه ده پاتې.
د منځني ختیځ په موسسه کې جګپوړې څېړونکې فاطمې امان فاکس نیوز دیجیټل ته ویلي، چې لا هم په افغانستان کې د ملي مقاومت جبهه د طالبانو د حکومت سرسخته مخالفه ډله ده؛ خو نوموړې دمګړۍ د طالبانو پر ځای د بلې ډلې ځای ناستی نه ویني.
هغې ویلي: «په افغانستان کې له یو سراسري پاڅون او د نړۍوالې ټولنې له پراخ ملاتړ پرته، بله هېڅ داسې ډله نه شته چې په ځانته سر وتوانېږي د طالبانو د حکومت ځای ونیسي.»
د ازادۍ جبهه او د ملي مقاومت جبهه دوه سیاسي او پوځي ډلې دي، چې له طالبانو د بیا واکمنېدو وروسته یې سر راپورته کړی او له دغې ډلې سره وسلهواله جګړه کوي.
دغو دواړو جبهو په تېرو درېیو کالو کې د افغانستان په بېلابېلو برخو کې د طالبانو پر ضد یو لړ عملیات هم کړي دي.
د فاکس نیوز خبري شبکې د ملګرو ملتونو د امنیت شورا راپور ته په اشارې لیکلي، چې طالبانو د خپلو ژمنو په خلاف په افغانستان کې د ترهګرو ډلو له هغې ډلې د القاعده شبکې لپاره د راټولېدو زمېنې برابرې کړې دي.
د ملګرو ملتونو د امنیت شورا په راپور کې راغلي، چې طالبانو د افغانستان په ځینو ولایتونو کې د القاعده شبکې لپاره اډې او مرکزونه جوړ کړي دي.
د هغو اسنادو له مخې چې افغانستان انټرنشنل ته رسېدلي، له کلونو راهیسې د دولت یار په ولسوالۍ کې د «سردارخېلو» او «تایمني» قومونو ترمنځ د ځمکې پر سر شخړه روانه ده.
ويل کېږي، چې د دغو دوو قومونو ترمنځ پر شاوخوا اته سوه زره جريبه ځمکې شخړه ده.
د ځايي اوسېدونکو په خبره، په دې وروستيو کې په غور کې د طالبانو والي احمدشاه دين دوست د دې ډلې د قومونو او قبايلو د وزير نورالله نوري په ملتيا د دغو دوو قومونو ترمنځ د جګړې د مخنيوي اړوند پرېکړه کړې، چې د کشرو درې د کلي ټول اوسیدونکي دې خپل کورونه پریږدي او دغه کورونه او جایدادونه دې د سردارخیلو قوم ته وسپاري.
ځايي سرچينې وايي، چې د خلکو د شورا د معلوماتو له مخې، په کشرو کلي کې شاوخوا ٦٠٠ کورنۍ ژوند کوي.
دوی وايي: «په غور کې د طالبانو والي دغو کورنیو ته امر کړی، چې ژر تر ژره خپل کورونه پرېږدي او دا چې حق نه لري، چې کرنیز محصولات، وسایل او څاروي له ځانه سره یو سي.»
تر اوسه طالبانو د دې پېښې په اړه څه نه دي ویلي.
یو شمېر ځايي اوسېدونکي، چې د طالبانو له خوا «جبري ایستلو» ته اړ شوي، افغانستان انټرنشنل ته ځینې اسناد استولي او ادعا کوي، چې په دغه کلي کې له څو نسلونو او نږدې ۵۰۰ کلونو راهیسې ژوند کوي.
دوی وايي، چې د افغانستان د تاریخ کې د لومړيو وختونو د ملکیت سندونه لري؛ خو طالبان دا اسناد نه مني.
