د تاجکستان د ملي امنیت د کمېټې مشر سید مومن یتیموف کابل ته د خپل سفر په ترڅ کې د طالبانو له استخباراتي چارواکو سره کتلي دي. ډېپلوماتیکې سرچینې وايي، دغه تاجکستاني چارواکي په تېر اګست کې کابل ته سفر کړی او له طالب چارواکو سره یې د تاجکستان د اړیکو د ټینګولو په اړه خبرې کړې دي.
ډېپلوماتیکو سرچینو افغانستان انټرنشنل ته ویلي، چې مومن یتیموف د تاجکستان د استخباراتو لوړپوړی چارواکی دی، چې د ولسمشر امام علي رحمان په امر کابل ته تللی دی.
دوشنبه ته له ستنیدو وروسته، هغه خپل سفر له «محتوا» څخه ډک وباله.
وروسته له هغه چې طالبانو د افغانستان واک تر لاسه کړ، یو شمېر پخوانیو پوځیانو او د طالبانو سیاسي مخالفانو په تاجکستان کې پناه واخیسته.
دا مهال د افغانستان د ملي مقاومت جبهې یو شمېر مشران په تاجکستان کې مېشت دي.
تاجکستاني چارواکو په تېرو درېیو کلونو کې په وار - وار پر طالبانو نیوکې کړې دي.
د تاجکستان ولسمشر وايي، طالبان له خپلو ژمنو سره - سره په افغانستان کې د یوه جامع حکومت د جوړېدو مخالف دي.
امام علي رحمان په ۱۴۰۱ کال کې وویل، چې طالبان په افغانستان کې د مختلفو توکمونو په وړاندې د تبعیضي یرغل سياست مخ ته وړي.
امام علي رحمان همداراز خبرداری ورکړی، چې افغانستان په ځانګړې توګه شمالي ولایتونه د نړۍوالې ترهګرۍ په ځاله بدل شوي دي.
د تاجکستان د کورنیو چارو وزیر هم ویلي، چې طالبانو د «ترهګرو ډلو» څه باندې درې زره غړو ته افغان پاسپورټونه ورکړي دي.
په افغانستان کې د داعش ډلې د فعالیت له زیاتېدو سره طالب چارواکو د تاجکستان په ګډون د افغانستان ګاونډي هېوادونه د داعش په ملاتړ تورن کړل.
