د خیبر پښتونخوا په لکي مروت کې د پولیسو هغه پرلت پای ته ورسېد، چې ۵ ورځې وړاندې پیل شوی و

تېره اونۍ د لکي مروت ولسوالۍ پولیسو په چارو کې د خپلواکۍ تر لاسه کولو او په سیمه کې د پوځ د لاسوهنې پر ضد پرلت وهلی و او دا خبرداری یې ورکړی و، چې که غوښتنې یې و نه منل شي؛ نو دوی به خپلو دندو ته حاضر نه شي.
دغه پرلت له هغې وروسته پای ته ورسېد، چې د لکي مروت ولسوالۍ مخورو او قومي مشرانو جرګه وکړه او پرېکړه یې وکړه، چې د پولیسو ټولې غوښتنې به منل کېږي او په راتلونکو شپږو ورځو کې به ټول پوځي کنډکونه له دغې سیمې څخه ووځي.
د دغه پرلت له امله په لکي مروت کې ټولې لارې او بازارونه تړل شوي وو او له امله یې خلکو ته ډېرې ستونزې را ولاړې کړې وې.
دا رنګه جرګې پرېکړه وکړه،چې مرکزي حکومت به په لکي مروت ولسوالۍ کې د پولیسو په شمېر کې د زیاتوالي تر څنګ هغوی ته نورې پرمختللې وسلې او پوځي ګاډي هم په واک کې ورکوي.
جرګه مارو له پرلت کوونکو پولیسو هم غوښتي، چې په لکي مروت کې به ټولې تړلې لارې د تګ راتګ لپاره خوشې کېږي او پولیس به د لارو خوندیتوب ته پاملرنه کوي.
دا رنګه جرګه‌والو د لکي مروت پولیسو ته د مرکزي حکومت له‌خوا د یو لړ امتیازاتو تر څنګ پر دې خبرې هم ټینګار وکړ، چې د پولیسو د روغتیايي خدمتونو لپاره به ډېره پاملرنه کېږي او هغه پولیس چې د دغه پرلت سرلاري وو، هغوی ته به د انظباطي سزاوې نه ورکول کېږي.
جرګې پرېکړه کړې، که د پولیسو غوښتنې و نه منل شوې دوی کولای شي بیا له سره پرلت پیل کړي.
دغه پرلت چې تېره اونۍ پیل شوی و، د لکي مروت پولیسو نیوکه کوله چې دوی په خپلو چارو کې خپلواک نه دي او پوځ د دوی چارې ټکنۍ کړې او په سیمه کې د پوځي کړیو له‌خوا نا امنیو ته لمن وهل کېږي.
خو د پولیسو د دغه اعتراض تر څنګ ولسي خلکو هم پر پوځي کنډکونو او ځواکونو نیوکې کولې، چې ګواکې په سیمه کې د دوی د شته‌والي له امله نا امني زیاته شوې او له سیمې څخه یې د پوځي کنډکونو د اېستلو غوښتنه کوله.
تر اوسه د پاکستان د پوځي سرچېنو له‌خوا په دې اړه څه وضاخت نه دی ورکړل شوی او دا هم مالومه نه ده، چې د پوځ د چارواکو غبرګون به په دې اړه څه وي.