سرچېنې وایي، په فاریاب ولایت کې تاجک ټبره قوماندان عبدالقیوم صداقت له هغه وروسته چې د فاریاب د پولیسو د امنیتي مرستیالۍ له دندې لرې کړل شو؛ نو د طالبانو له ډلې سره یې پرېکون وکړ.
په ظاهره، داسې برېښي چې د هغه پر ځای د بل کس ګومارنه د هغه له نظره د «نفاق او تبعیض» له مخې شوې.
سرچېنو د پنجشنبې په ورځ (د وږي ۲۲مه) افغانستان انټرنشنل ته داسې سندونه استولي، چې ښيي ښاغلی صداقت له خپلې دندې لرې کړل شوی او پر ځای یې بل کس د ملا حزب الله په نوم ګومارل شوی دی.
هغه ویلي، چې له دوه میاشتو راهیسې یې د دې لپاره چې «عدالت پلی او حق حقدار ته وسپارل شي» نوې دندې ته نه دی تللی.
عبدالقیوم صداقت ته یوه نږدې سرچېنه وايي:« د هغه له نظره، له نفاقه ډکې ګومارنې او د مجاهدینو [طالبانو] تر منځ بې باوري او ګډوډي له دغې ډلې څخه د هغه د بېلېدو لامل دی.»
د هغو سندونو له مخې چې افغانستان انټرنشنل ته رسېدلي، طالبانو د ۱۴۰۲ کال په کب میاشت کې عبدالقیوم صداقت د فاریاب ولایت د امنیتي چارو د مرستیال په توګه ګومارلی و.
له دې وړاندې په زابل کې د طالبانو امنیه قوماندان صلاح الدین ایوبي هم ویلي و، چې د طالبانو له ډلې جلا شوی دی.
د طالبانو مشر تل په خپلو غړو غږ کړی، چې د ده له اوامرو دې اطاعت وکړي؛ خو په حکومتي څوکیو ځینو ګومارنو د دوی تر منځ اختلافات رامنځته کړي، چې دغه څه ډېرو قوماندانانو ته د منلو نه دي.
پر طالبانو نیوکه کوونکي وايي، چې له دغې ډلې څخه د نورو قومونو د قوماندانانو پرېکون د دغې ډلې تر منځ د ژورو اختلافونو بېلګه ده او وايي چې دغه اختلافونه نن سبا ډېر ژور شوي دي.
