د طالبانو سترې محکمې د یوې خبرپاڼې په خپرولو سره ویلي، چې تېره ورځ یې په هرات ولایت کې درې تنه د نشهيي توکو د پلور، لېږد او رالېږد په تور په عام محضر کې ۳۹ ـ ۳۹ دورې وهلي دي.
د طالبانو سترې محکمې له لوري د یکشنبې په ورځ د (تلې لومړۍ نېټه) په یوه خبرپاڼه کې راغلي، چې د شنبې په ورځ د هرات ولایت د لومړۍ محکمې له لوري درې تنو ته د نشهيي توکو د خرڅلاو، لېږد او رالېږد په تور تعزیري سزا ورکړل شوې.
په خبرپاڼه کې د تورنو کسانو د هویت په اړه څه نه دي ویل شوي، خو زیاتوي، هر تورن کس یې د ۳۹ ـ ۳۹ دورو وهلو تر څنګ دوه ـ دوه کاله بند سزا هم ورکړې ده.
دا په داسې حال کې ده، چې طالبانو درې ورځې وړاندې په سرپل ولایت کې د «نامشروع اړیکو» او «زنا» په تور هم د سیمې اوسېدونکو ته سزاګانې ورکړې وې.
پر افغانستان د طالبانو له بیا واکمنېدو سره دغې ډلې یو ځل بیا په عام محضر کې د خلکو بدني سزاوې پیل کړې دي او نږدې هره ورځ له بېلابېلو ولایتونو څخه د تعزیري سزاګانو خبرونه خپروي.
د راپورونو له مخې؛ طالبانو یوازې په تېرو شپږو میاشتو کې د ښځو په ګډون شاوخوا ۲۰۰ کسان په عام محضر کې په دورو وهلي دي.
