په ملګرو ملتونو کې د ایران سفیر د امنیت شورا او د ملګرو ملتونو سرمنشي ته یو لیک استولی او له امنیت شورا یې غوښتي چې د اسراییل کړنې په کلکه وغندي. هغه د ملګرو ملتونو له امنیت شورا وغوښتل چې پر لبنان د اسراییل د بریدونو د څېړلو لپاره بیړنۍ غونډه وکړي.
د ایرواني په لیک کې د حسن نصرالله او ایران د سپاه پاسداران د عمومي عملیاتو د مرستیال عباس نیلفروشان وژل کیدو ته په اشارې سره ویل شوي چې اسراییل د امریکا لخوا دغه هیواد ته ورکړل شوي هاوان بمونه د هغه برید په ترسره کولو کې کارولي چې نصرالله پکې ووژل شو.
ایرواني په خپل لیک کې له امنیت شورا څخه غوښتي چې د اسراییل د بریدونو د مخنیوي لپاره سملاسي او پرېکنده ګامونه پورته کړي او «په سیمه کې د یوې پراخې جګړې رامنځته کیدو مخه ونیسي.»
په دمشق کې د ایران د کونسلګرۍ پر ودانۍ د اسراییل مخکني برید ته په اشارې سره د ایران استازی په خپل لیک کې په ډیپلوماټیکو ځایونو او د هغوی په استازو د هر ډول برید په وړاندې په کلکه خبرداری ورکړ او ټینګار یې وکړ چې «ایران له خپلو ملي او امنیتي ګټو څخه دفاع کوي. او د نړۍوالو قوانینو له مخې، هغه به د هیڅ ګام څخه ډډه ونه کړي.»
