یونېسف وایي، چې دغې ادارې د جاپان او د واکسین لپاره د نړۍوال اتحاد په همکارۍ په افغانستان کې د ۶۰ میلیونو ډوزونو د ذخیره کولو لپاره نوي تاسیسات جوړ کړي دي. دغې ادارې په خپل اېکس کې لیکلي، په دې تاسیساتو کې د واکسین د ډوزونو د ساتلو لپاره خونې او یخچالونه شامل دي.
د ملګرو ملتونو د ماشومانو صندوق «یونېسف» همداراز ویلي، چې د واکسین ډوزونه باید په سړو ځایونو کې وساتل شي؛ تر څو موثریت یې له لاسه ورنه کړي.
یونېسف په داسې حال کې دغه تاسیسات جوړوي، چې اسوشیټېډ پرېس د وږي په ۲۶مه د ملګرو ملتونو له خولې ویلي وو، چې طالبانو په افغانستان کې د ګوړن ضد واکسین کمپاین ځنډولی دی.
که څه هم د طالبانو د عامې روغتیا وزارت په افغانستان کې د پوليو واکسين د بندېدو اړوند خبرونه رد کړل؛ خو د ماشومانو د ګوزڼ ضد واکسین کمپاین چلوونکو بیا ویلي وو، چې طالبانو په ټول افغانستان کې د واکسین کمپاین د مېرمنو د ګډون او د امنیتي اندېښنو له امله ځنډولی دی.
د هغوی په خبره؛ په کندهار کې طالب مشران له دې وېرې چې د هغوی د استوګنې سیمې افشا نه شي او ګواښ ورته پېښ نه شي دغه کمپاین یې ځنډولی دی.
د یادولو ده، چې روان کال په افغانستان کې د ګوزڼ د ۱۸ مثبتو پېښو له ډلې ۱۱ یې په کندهار کې ثبت شوې دي.
افغانستان او پاکستان د نړۍ هغه دوه هېوادونه دي، چې لا هم د ګوزڼ ناروغۍ پېښې په کې لېدل کېږي او د هرې ورځې په تېرېدو سره په کې د زیاتېدو په حال کې دي.
