محمود احمدي نژاد: په ایران کې د موساد سره د مبارزې د پټې قطعې سرپرست د اسراییل مامور و
د ایران پخواني ولسمشر محمود احمدي نژاد د ایران پر استخباراتي ادارو د اسراییل موساد د پراخ نفوذ خبر ورکړ.
د ایران پخواني ولسمشر محمود احمدي نژاد د ایران پر استخباراتي ادارو د اسراییل موساد د پراخ نفوذ خبر ورکړ.
هغه وویل، چې د ایران استخباراتو د اسراییل د موساد له فعالیتونو سره د مبارزې لپاره یوه ځانګړې قطعه جوړه کړې وه؛ خو معلومه شوه، چې دغه قطعه په خپله د اسراییل د اجنټانو په لاس کې ده.
احمدي نژاد له سي اين اين ترک سره په مرکه کې وویل، چې د دې قطعې مشر په حقیقت کې د اسراییل کارمند و.
هغه ادعا وکړه، چې د ایران د استخباراتو په ډله کې شل نورو اجنټان، چې د اسراییل د استخباراتي فعالیتونو د څارنې دنده پر غاړه درلوده هم «خیانت» کړی دی.
د احمدي نژاد په وینا دغو اجنټانو اسراییل ته د ایران د اټومي پروګرام په اړه حساس معلومات ورکول.
د ایران پخواني ولسمشر ویلي، چې د عملیاتو له بشپړېدو وروسته دغه کسان اسراییل ته وتښتېدل.
په دې وروستیو کې د سپاه پاسدارانو انټرنټي ټلویزیون ویاند وحيد خضاب «د ایران په خاوره کې د اسراییل وروستي عمليات» تاييد کړل.
هغه د یوې معلوماتي سرچینې په حواله اعلان وکړ چې «په دې یوه میاشت کې اسراییل د ایران په خاوره کې عملیات کړي، شهیدان یې کړي او اسناد یې تښتولي دي.»
شا او خوا یوه اونۍ مخکې د سپاه پاسداران د عامه اړیکو ادارې د هېواد په شپږو ولایتونو کې د «اسراييل سره د همکارۍ په تور» د ۱۲ کسانو د نيولو خبر ورکړی و.
په دې اعلامیې کې ویل شوي، چې نیول شویو کسانو د یوې شبکې له مخې په ایران کې د امنیتي ضد اقداماتو د ترسره کولو نیت درلود.
