هندي پولیسو په نوي ډیلي کې د ۲۶۷ میلیون ډالرو په ارزښت ۵۶۰ کیلوګرامه کوکایین نیولي دي. د نوي ډیلي پولیس شکمن دي، چې دا توکي د نشه يي توکو له یوې نړۍوالې شبکې سره تړاو لري، چې مشري یې یو افغان وګړی کوي.
پولیسو دغه نشه يي توکي د نوي ډیلي په سویلي مهرولي سیمه کې پر یوه استوګنځي د برید پرمهال ضبط کړي او په دې تور یې څلور تنه نیولي دي.
دغو کسانو غوښتل چې دغه نشه يي توکي په نوي ډیلي او د پلازمینې شاوخوا کې وپلوري.
دغه نشه يي توکي داسې مهال ضبط کیږي، چې هندي پولیسو دوه ورځې وړاندې د نوي ډیلي په تېلک نګر سیمه کې د عبدالوارث هاشمي او عبدالنایب په نومونو دوه تنه نور افغانان هم په ورته تور نیولي دي.
له دغو کسانو نه ۴۰۰ کیلوګرامه هیرویین او ۱۶۰ ګرامه کوکایین نیول شوي.
د وارث او نایب په اړه ویل کیږي، چې له ۲۰۲۰ کال راهیسې په هند کې د پناه غوښتونکو په توګه ژوند کوي؛ خو کورنۍ یې په افغانستان کې اوسیږي.
پولیس وايي، نوموړو د نوي ډیلي او پلازمینې په شاوخوا کې د نشه يي توکو غوټې لېږدولې او د هرې غوټې په بدل کې یې سل ډالر ترلاسه کول.
د چهارشنبې ورځې د څلورو نیول شویو کسانو د هویت په تړاو پولیسو تر اوسه څه نه دي ویلي.
دا لومړی ځل نه دی، چې په هند کې د نشه یي توکو د قاچاق او پلور تور پر افغانانو پورې کیږي، بلکې د روان کال په مارچ میاشت کې هندي پولیسو خبر ورکړی و، چې په ګوا کې یې څلور افغانان د هېروینو د پلور په تور نیولي او دوی په یوې نړۍوالې شبکې پورې اړوند دي.