د پښتون ژغورنې غورځنګ مشر وايي، پولیسو په خیبر ولسوالۍ کې د جرګې لپاره پر ټاکل شوې سیمه د دویم ځل لپاره برید کړی او ډزې روانې دي. منظور پښتین په خپل اېکس کې د غورځنګ له ملګرو غوښتي چې د جرګې ځای ته ځانونه ور ورسوي. نوموړی وايي، بېګا هم پولیسو د دوی خېمې سوځولې او وسایل یې وړي.
د پښتون ژغورنې غورځنګ په پاکستان کې د میشتو پښتنو پر ستونزو د بحث لپاره د اکتوبر پر ۱۱مه د پښتنو قومي جرګه یا عدالت په نامه جرګه رابللې
دغه غورځنګ د پښتنو بېلابېلو سیاسي، ټولنیزو او ولسي مشرانو ته دې جرګه کې د ګډون بلنه ور کړې ده.
د پښتون ژغورنې غورځنګ وايي، تېره شپه هم پولیسو ددې جرګې د تنظیموونکو د راټولېدو پر ځای برید کړی و او یو شمېر وسایل، خیمې او نور توکي یې له منځه وړي او ځینې یې له ځانونو سره وړي دي.
له دې پېښې نږدې ۱۲ ساعته وروسته بیا د جرګې پر ځای برید شوی دی.
د دغه غورځنګ غړو پر ټولنیزو شبکو ویډیوګانې خپرې کړې، چې د جرګې په سیمه کې د ډزو غږونه پکې اورېدل کیږي.
منظور پشتین د خیبر پښتونخوا د پولیسو ددغه ګام تر شا څارګرې ادارې په لاس لرنه تورنوي او وايي، دا لومړی ځل دی، چې د پښتنو پر جرګې برید کیږي.
په ورته وخت کې د پي ټي اېم غړي وایي، چې پاکستاني پولیسو په دیره اسماعیل خان کې د دغه غورځنګ جګپوړی غړی عالمزیب مسید نیولی.
عالمزېب مسید د ورکو خلکو او د پاکستان په زندانونو کې د پښتنو زندانیانو په اړه د څیړنې او پلټنې ډلې غړی ګڼل کیږي.
هغه په دې وروستیو کې په قبایلي سیمو، په ځانګړې توګه وزیرستان کې د ترهګرۍ خلاف د قبیلو د را پورته کېدو کمپاین پیل کړی و
