د تحریک طالبان پاکستان ډلې (ټيټيپي) د پاکستان د بهرنیو چارو وزارت هغه تورونه بې بنسټه وبلل چې وایي، دغه ډله په افغانستان کې فعالیت کوي او له هغه ځایه خپل بریدونه پلانوي.
د دغې ډلې ویاند محمد خراساني رسنیو ته په استول شوې خبرپاڼه کې د پاکستان د بهرنیو چارو د وزارت د ویاندې زهرا بلوچ هغه ادعا په کلکه رد کړه، چې تېره ورځ یې دغه ډله تورنه کړې وه چې د افغانستان له خاورې خپل فعالیتونه پر مخ وړي.
په خبرپاڼه کې د ټولو سیمهییزو او نړۍوالو خپلواکو رسنیو خبریالانو ته بلنه ورکړل شوې، چې که دوی د پاکستان د ننه هر ځای غوښتي وي د دوی مشرتابه ورسره کتلای او هر ډول مرکو ته چمتووالی لري.
په خبرپاڼه کې دا رنګه لیکل شوي چې:«د ډیورنډ په کرښه د اغزن تار غځول، تر ځنګ یې د امنیتي کمرو شته والی، د ۸۰۰ په شاوخوا کې د بې پیلوټه الوتکو ګزمې او د زرګونو پاکستاني سرتېرو په مېشتېدا پر دغه کرښه انسانان خو لا پرېږده چې مرغۍ هم رپ نه شي وهلای؛ نو زموږ وسلهوال به څنګه پرې تګ راتګ وکړي.»
په خبرپاڼه کې ویل شوي، چې د دوی وسلهوال د ډیورنډ د کرښې دې غاړه د خپلو ولسونو په منځ او د هغوی په ملاتړ ژوند کوي او د دغې ډلې ټول فعالیتونه همدلته پلانیږي او له همدغه ځایه یې د پاکستان له امنیتي ځواکونو سره جګړه روانه ده.
د تحریک طالبان پاکستان (ټيټيپي) دغه توند غبرګون له هغې وروسته مخې ته راځي، چې تېره ورځ د پاکستان د بهرنیو چارو وزارت ویاندې ممتاز زهرا بلوچ په یوې خبري ناسته کې دغه ډله تورنه کړه چې د افغانستان په خاوره کې پټنځایونه لري او له هماغه ځایه د وسلهوالو بریدونو لپاره پلانونه جوړوي.
تر ممتاز زهرا بلوچ وړاندې د پاکستان ګڼو جګپوړو حکومتي چارواکو هم پر افغان طالبانو تور پورې کړی، چې د ټيټيپي ډلې ته یې په خپله خاوره کې پناه ورکړې او د هغوی لپاره جګړهییز امکانات هم چمتو کوي؛ خو طالبانو دغه تورونه په کلکه رد کړي او پاکستاني چارواکي یې د خپل هېواد د امنیت په ټینګښت کې ناکامه بللي دي.
