په غور ولایت کې د طالبانو د امر بالمعروف او نهې عن المنکر ریاست وایي، چې په دغه ولایت کې یې د جبري ودونو، د ښځو پر وړاندې د تاوتریخوالي او د ښځو د حقونو تر ۶۰۰ ډېرې قضیې څېړلې دي.
د طالبانو تر کنټرول لاندې ملي راډیو سره په غور ولایت کې د دغې ډلې د امر بالمعروف او نهې عن المنکر ریاست د مطبوعاتو مسوول شمس الحق په خبرو کې ویلي، چې د «اسلامي شریعت» له مخې د ښځو حقونو ته ژمن دي.
هغه وایي: «موږ د اسلامي ارزښتونو او احکامو په بنسټ د ښځو حقونو ته رسېدنه کوو.»
د هغه په وینا، په غور ولایت کې یې د جبري ودونو، ښځو ته د میراث د حقونو د نه ورکړې او د ښځو پر وړاندې د تاوتریخوالي له پېښو مخنیوی کړی او دغه ډول ۶۰۰ پېښې یې څېړلې دي.
د طالبانو د امربالمعروف هغه اداره ده، چې واک ته د دغې ډلې له رسېدو راهیسې یې پر ښځو لسګونه فرمانونو او بندیزونه لګولي دي، چې ان دغه ښځې یې له خپلو بنسټیزو حقونو محرومې کړې هم دي.
طالبان داسې مهال د ښځو د حقونو په اړه خبرې کوي، چې همدا تېره ورځ په خوست او بغلان ولایت کې طالبانو دوه ښځې د «بداخلاقۍ» په تور د خلکو د سترګو په وړاندې په دورو وهلې دي.
که څه هم چې نړۍواله ټولنه او د بشري حقونو د ملاتړ بنسټونه د طالبانو پر دغو کړنو سختې نېوکې کوي؛ خو هغوی وایي چې دا هر څه د «شریعت» د پلي کېدو په موخه کوي.