د ارغواني شنبو غورځنګ د هغو شپږو هېوادونو له پرېکړې هرکلی کړی، چې له مخې یې د افغانستان د ښځو د حقونو پر وړاندې د طالبانو سرغړونې د جرمونو نړۍوالې محکمې ته وړاندې کړې دي.
تېره ورځ چیلي، کوسټاریکا، هسپانیا، فرانسې، لوګزامبورګ او مکسیکو په افغانستان کې د ښځو له حقونو د سرغړونې قضیه د جرمونو نړۍوالې محکمې ته وړاندې کړه.
دغو هېوادونو د جرمونو نړۍوالې محکمې له څارنواله وغوښتل، چې د افغان ښځو او نجونو له حقونو په پرله پسې او سیستماتیک ډول سرغړونې وڅېړي.
دغه غورځنګ د یوې خبرپاڼې په خپرولو سره ویلي، واک ته د طالبانو له رسېدو وروسته په افغان مېرمنو سخت بندیزونه لګېدلي چې د زدهکړو، کار او عامه ژونده یې منعه کړې دي.
د خبرپاڼې له مخې، د طالبانو دغه کړنې د بشري حقونو د سختو سرغړونو په کتار کې راځي او په پراخه کچه غندل شوي دي.
د ارغواني شنبو غورځنګ د افغانستان له ښځو سره د پیوستون له دغه ګامه هرکلی کوي او پر ټولو هېوادونو غږ کوي، چې د دغو شپږو زړورو هېوادونو تګلاره وڅاري.
د خبرپاڼې په وروستۍ برخه کې راغلي، چې نړۍوال ملاتړ د دې لپاره اړین دی چې عدالت ټینګ شي او د افغانستان ښځې هېرې نه شي.
دغه غورځنګ له نړۍوالې ټولنې غوښتي، چې د عدالت او جنسیتي برابرۍ لپاره په دې مبارزه کې متحد شي او دا یقیني کړي چې د افغانستان په ګډون ټولو ښځو ته هغه وقار او حقونه ورکړل کېږي چې دوی یې وړې دي.
