طالبان وايي د دې ډلې د صنعت او سوداګرۍ وزير په مشري پلاوي د ترکيې د بهرنیو اقتصادي اړیکو شورا له غړو سره د دوه اړخیزې سوداګرۍ پر زياتوالي خبرې کړې. طالبان وايي، د ترکيې دغې شوار په بیلابیلو برخو کې د همکارۍ او پانګونې لپاره په کابل کې د یوه دفتر پرانیستلو ته ليوالتیا هم ښودلې.
د طالبانو د صنعت او سوداګرۍ وزارت د شنبې په ورځ په يوه اعلاميه کې ویلي، چې په دې ليدنه کې د ترکیې د دغهې شورا غړیو د افغانستان د انرژۍ، ټکنالوژۍ، نفتو او ګازو، ساختماني چارو، لوژیستیک، کانونو، او نساجۍ په سکتورنو کې د همکارۍ او پانګونې لپاره چمتو والی ښودلی.
طالبانو په خپله اعلاميه کې ویلي، چې په دې ليدنه کې د ترکیې د نفت او ګازو، هوایي شرکتونو، معادنو او ټکنالوژۍ سکتورنو استازو ګډون درلود.
د ترکيې د بهرنيو اقتصادي اړیکو شورا تر اوسه د دې ليدنې په اړه څه نه دي ويلي.
طالبان زياتوي، چې ترکیې دغه شورا د خصوصي سکتور له غړو جوړه یوه باور لرونکې شورا ده.
که څه هم طالبان په پرله پسې توګه هڅه کوي، چې د ګاونډيو او سيمې هېوادونو سره سوداګريزې اړيکي پراخي کړي؛ خو په کور دننه پر دې ډله انتقادونه دي، چې خلکو ته د کار فرصتونه په برابرولو کې پاته راغلي دي.
