د جرمني د هوايي چلند مجلې «فلوګ ریویو» په یو راپور کې لیکلي، چې د ایران هوایي ځواک د نومبر په ۱۸ نېټه د 'کومسومولسک اون امور' الوتکو په فابریکه کې په خصوصي مراسمو کې دوه سوخي-۳۵ الوتکې ترلاسه کړي دي.
د دغه راپور له مخې، د دغو جنګي الوتکو پرزې په جلا توګه د روسیې د هوایی ځواک د الوتکو په وسیله د تهران د مهراباد هوایي ډګر ته لیږدول شوي او له هغه ځایه د همدان ښار ته څېرمه یوې اډې ته وړل شوي دي.
د فلوک ریویو د راپور له مخې، د ایران هوايي ځواک په پیل کې یوازې په اصفهان کې د خپلو ایف-۱۴ الوتکو پر ځای د سوخي الوتکو کارولو اراده درلوده، خو وروسته بیا د ایران د سوخي - ۳۵ الوتکو غوښتنه له ۲۵ څخه ۵۰ ته لوړه شوه.
د دغه راپور له مخې، دا به د ایران هوایی ځواک ته اجازه ورکړی چې خپل ځینې پخوانی جنګي الوتکې چې اوس مهال د همدان د تکتیکي جنګي الوتکو په ډله کې دنده ترسره کوي، ترې کار وانخلي.
ایراني چارواکو تر اوسه په دې اړه کوم غبرګون نه دی څرګند کړی.
په دې وروستیو ورځو کې اسراییلي رسنۍ اینتلي ټایمز هم ایران ته د سوخي-۳۵ ډوله الوتکې د سپارلو پخلی کړی او دغه اقدام یې د تهران او مسکو د ګډې همکارۍ په چوکاټ کې او د اسراییل پر وړاندې د ایران د دفاعي ځواک د پیاوړتیا په هدف ارزولی دی.
دا لومړی ځل نه دی چې بهرنۍ رسنۍ د ایران د هوايي ځواک د پلانونو جزییات افشا کوي.
فلوګ ریویو د ۱۴۰۳ کال په وږي میاشت په یو راپور کې لیکلي و، چې ایران د خپل هوایي ځواک لپاره سپکې الوتکې جوړوي.
