د غزې روغتیایي چارواکي: د اسراییلو په تازه بریدونو کې لږ تر لږه ۲۲ تنه وژل شوي
د شنبې په ورځ په غزه کې د اسراییلو په هوايي بریدونو کې لږ تر لږه ۲۲ فلسطینیان وژل شوي دي.
د شنبې په ورځ په غزه کې د اسراییلو په هوايي بریدونو کې لږ تر لږه ۲۲ فلسطینیان وژل شوي دي.
رویټرز خبري اژانس په غزې کې د روغتیایي چارواکو له قوله خبر ورکړی، چې د اسراییلو یو هوایي برید د غزې په مرکزي سیمه دیر البلاح کې د ښاروالۍ ودانۍ ته څېرمه د مرستو د ترلاسه کولو په موخه په راټولو شویو خلکو شوی، چې لږ تر لږه لس کسان په کې وژل شوي دي.
د حماس یوې سرچینې رویټرز ته ویلي، چې برید د غزې په مرکزي برخه کې تر سره شوی چې په کې د حماس د اداري کمېټې مشر دیاب علي الجارو وژل شوی دی.
د اسراییلو پوځ بیا ویلي، الجارو، چې د دیر البلاح ښاروال هم و، د برید هدف و او هغه د حماس له وسله والو سره مرسته کوله.
په ورته مهال په سیمه کې په یو جلا برید کې څلور نور کسان هم وژل شوي دي.
د اسراییلو پوځ ویلي، چې په دیر البلاح کې یې د وسله والو هغه زیرمې په نښه کړي چې دوی ترې د پټنځایونو کار اخیسته.
د پوځ په وینا، د غزې په ښار کې د بې ځایه شویو خلکو په یو پخواني کمپ باندې جلا برید کې هم د حماس جنګیالي په نښه شوي.
خو د فلسطین روغتیایي چارواکو د اسراییلي پوځ ددغه ادعا په تړاو ویلي، چې په دغه برید کې د یوې ښځې او ماشوم په ګډون لږترلږه اوه کسان وژل شوي دي.
رویټرز خبري اژانس لیکلي، چې ونه توانید چې دا تایید کړي چې په وژل شویو کسانو کې کوم جنګیالي وو او که نه. حماس خپل تلفات نه افشا کوي او د فلسطین د روغتیا وزارت د جنګیالیو او ملکیانو د وژل شویو ترمنځ توپیر نه کوي.
