د هندي سینما تر ټولو نادره پېښه: درې خانان به په یو فلم کې راڅرګند شي

د هندي سینما (بالیووډ) فلمي لوبغاړی عامر خان چې له فلمونو سره یې مخه ښه کړې وه د خپلو اولادنو په غوښتنه له څلور کلن ځنډ ورسته سینما ته راوګرځېد.

نوموړی به له دوو نورو خانانو سلمان خان او شاه روخ خان سره یو ځای په فلم کې راڅرګند شي.
د بالیووډ مشهور ستوری عامر خان په ۲۰۲۰ کال کې د کورنا په څپه کې د خپلې کورنۍ سره د اړیکو د له لاسه ورکولو او د خپل شخصي ژوند د بدلولو د اړتیا له امله خپل فلمي فعالیتونه بند کړل.
نوموړی اوس مهال "ورکه شوې مېرمن" فلم ته په بازار موندنه بوخت دی.
دغه فلم چې عامر خان جوړ کړی، لارښوده یې د ده پخوانۍ مېرمن کرن راو ده.
دا فلم په ټولنیزو دودیزو مسایلو جوړ شوی، چې په هند کې د ښځو پر وړاندې روایتي محدودیتونه په کې ننداره شوي.
عامر خان چې د هندي سینما بالیووډ له درېیو مشهورو خانانو څخه یو دی، اعلان کړی چې چمتو دی له سلمان خان او شاه رخ خان سره په یوه فلم کې ګډ کار وکړي.
هغه وویل: "موږ تېر کال ناست وو او ما وویل، مخکې له دې چې موږ ټول تقاعد شو، باید یو ځای فلم جوړ کړو که نه لیدونکي به په رېښتني توګه له موږ څخه نفرت وکړي."
عامر خان دا هم زیاته کړه: "موږ درې واړه دې ته سترګې په لار یو، چې ښه کېسه او سکرپټ پيدا کړو ترڅو په ګډه په کې کار وکړو او هیله ده، چې ژر دا کار ترسره شي.
هېره دې نه وي، چې تر دې وړاندې سلمان خان او شاه روخ خان د "پټهان" په ګډون په څو فلمونو کې یو ځای کار کړی، خو تر اوسه درې واړه خانان په یوه فلم کې یوځای نه دي راڅرګند شوي.
که دا فلم جوړ شي، نو دا به په هندي سینما کې یوه نادره پېښه وي