سرچینې وايي، د خیبرپښتونخوا په کرک ولسوالۍ کې د پولیو کارکونکو د موټر د ټکر له امله د یوه پولیس په ګډون درې تنه مړه شوي او ۱۵ نور ژوبل دي. د پولیو کارکونکو فلانکوچ موټر له یوه موټرسایکل سره ټکر شوی.
د خیبرپښتونخوا په کرک ولسوالۍ کې سرچینې وايي، چې د پولیو کارکونکو د موټر ټکر له امله د یوه پولیس ساتونکي په ګډون درې تنه مړه شوي او ۱۵ نور ژوبل دي.
په سیمه کې خبریالان وايي، چې د پولیو د کارکونکو د سورلۍ دغه موټر له کرک څه ټانګ ولسوالۍ ته د تګ په حال کې و، چې له یوه موټرسایکل سره ټکر شوی او له امله یې یاده مرګ ژوبله اوښتې ده.
د یوه بل خبر له مخې د بنو کلاخیلو سیمه کې د پولیو یو کارکونکی د وسله والو په ډزو کې وژل شوی.
پولیس دغه پېښه تاییدوي او وايي چې بریدګر له سیمې په تېښته بریالي شوي دي.
په سیمه کې خبریال لال وزیر وايي، چې په وروستیو کې په خیبرپښتونخوا د پولیو پر کارکونکو بریدونه ډیر شوي او حکومت یې د امنیت په ټینګولو کې پاتې راغلی.
په بنو کې د پولیو پر کارکونکو د ننني برید مسوولیت کومې ډلې په غاړه نه دی اخیستی.
د هندي رسنیو د راپورونو له مخې د هند مشهور تبله غږوونکی ذاکر حسین د ۷۳ کلونو په عمر مړ شو هندي رسنیو ویلي، چې نوموړی د ډیسمبر میاشتې په ۱۵مه نېټه د امریکا د کالیفورنیا ایالت په فرانسیسکو ښار کې د سږو ناروغۍ له امله مړ شو.
ذاکر حسین د ۱۹۵۱ میلادي کال د مارچ په نهمه زیږیدلی و چې د خپل پلار الله رخا قریشي څخه یې تبله زده کړې وه او په کم عمرۍ کې یې نړۍوال شهرت ترلاسه کړ.
د هند لومړي وزیر نریندرا مودي د هغه پر مړینه ژوره خواشیني څرګنده کړې او هغه یې د هندي موسیقۍ نه تکراریدونکي پانګه وباله.
مودي زیاته کړې چې ذاکر حسین کلاسیکې هندي موسیقۍ ته نړۍوال شهرت ورکړ.
د موسیقۍ پوهان په دې باور دي چې نوموړي د خپل ژوند په اوږدو کې د هند د کلاسیکې موسیقۍ او عصري موسیقۍ د یو ځای کولو لپاره ځانګړي نوښتونه وکړل.
د موسیقۍ د پوهانو په وینا؛ ذاکر حسین د هند لرغونې موسیقي په خورا ښه شان سره د نړۍ د موسیقۍ له نورو جریانونو سره شریکه کړه چې له دې سره یې تبله له عصري موسیقۍ سره یوځای کړه.
د هندي سینما مشهورو ستورو هم د ذاکر حسین د مړینې له کبله د هغه مینه والو سره خواخوږي کړې ده.
ښاغلي حسین ته د هند د دولت له لوري سترې دولتي جایزې ورکړل شوي چې په کال ۱۹۸۸ کې یې د پدماشري او په ۲۰۰۲ میلادي کال کې یې د پدما بهوشن په نوم د هند سترې ملکي جایزې ګټلې وې.
هغه همدا راز یو شمېر نړۍوالې جایزې هم ترلاسه کړې وې او د نړۍ په بېلابېلو هېوادونو کې یې د موسیقۍ په فیسټیوالونو کې تبله غږولې وه.
ذاکر حسین له یوې نڅاګرې انتونیا مینیکولا سره واده کړی و چې ترې دوه لوڼې لري او هغوی هم د موسیقۍ پر مسلکي زده کړو او فلم جوړونې بوختې دي.
د پاکستاني رسنیو د راپورونو له مخې په کورمه کې د مذهبي تاوتریوخالي له امله له ۶۸ ورځو راهیسې د لارو تړل کېدو له امله په تازه پېښه کې درې ماشومانو په روغتونونو کې مړه شوي. ویل کیږي، په رغتونونو کې هر ډول درمل خلاص شوي.
د روانې لیندۍ میاشتې په ۲۴مه کورمه کې د لارو تړل کېدو له امله د ۱۷ ماشومانو په ګډون ۳۰ ناروغان مړه شوي وو.
پاکستاني رسنۍ وايي، کورمه کې د مذهبي تاوتریخوالي له امله د لارو له تړل کېدو سره، هلته په روغتونونو کې درمل، خوراکي او سون توکي خلاص شوي او د ژوند په هره برخه کې یې خورا ډیرې ستونزې رامنځته کړې دي.
سیمهییز خبریالان وايي، چې په دغې سیمه کې د مذهبي تاوتریخوالي له امله دوو قبیلو یو د بل په وړاندې لارې او بازارونه تړلي او په سیمه کې د نورو اړینو توکو د کمي تر څنګ د درملو کمی هم رامنځته شوې.
د جګړې او غچ اخیستنې له امله د سیمې ناروغان د پاکستان نورو سیمو ته هم نه لېږدول کیږي چې په لارو او یا بسترونو کې ساوې ورکوي.
د کورمې د دغې لانجې د حل په موخه په کوهاټ کې روانه لویه جرګه پرون بې پایلې پای ته رسیدلې وه.
د دغې جرګې غړیو له پاکستاني حکومت غوښتي چې، له ترې منګل څخه تر ټل پورې غځېدلې لارې بايد په خوندي ډول پرانیستل شي، چې له څه باندې دوو مياشتو راهيسې د تګ راتګ پر مخ تړل شوې دي.
په کورمه کې د قبیلو تر منځ د مذهبي تاوتریخوالي له امله رامنځته شوې جګړې په تېرو دوو میاشتو کې د سیمې خلک د خوړو، سون توکو، درملو او نورو اړینو توکو له زیات کموالي سره مخ کړي او د ژوند په ټولو برخو کې ستونزې ورته جوړې شوې دي.
د پاکستان لومړی وزیر شهباز شریف پېښور کې پر یوه پوځي ښوونځي د برید لسم تلین په رارسېدو سره ویلي، چې له ترهګرۍ سره د مبارزې لپاره یې هوډ کلک دی. نن له دې امله د پاکستان په لویو ښارونو کې ښوونځي رخصت دي.
د پاکستان لومړي وزیر شهباز شریف پېښور کې پر یوه پوځي ښوونځي د برید لسم تلین په رارسېدو سره په یوه خبرپاڼه کې ویلي، چې له ترهګرۍ سره د مبارزې لپاره یې هوډ کلک دی او په دې برخه کې تر پایه خپله مبارزه روانه ساتي.
د ۲۰۱۴ کال د ډیسمبر ۱۶مه سهار د پاکستاني طالبانو اوه تنه وسله والو او ځانمرګو بریدګرو د پېښور په ورسک روډ کې پر یو پوځي ښوونځي ( ارمي پبلیک سکول ) وسله وال برید وکړ چې په پایله کې یې ۱۴۹ کسان ووژل شو چې له ډلې یې ۱۳۲ تنه د دغه ښوونځي زده کوونکي وو.
د رسنیو د معلوماتو له مخې په دغه پېښه کې د وژل شویو کوچنیانو عمرونه له اتو کلنو تر ۱۷ کلنو پورې وو.
نن د پاکستان په لاهور، راولپینډۍ، پېښور او د اسلام اباد په ګډون په یو شمېر لویو ښارونو کې د دغه برید په یاد د ایالتي حکومتونو له لوري ښوونځي رخصت کړای شوي دي.
شهباز شریف په خپره کړې خبرپاڼه کې ویلي چې «دغه وحشیانه پېښه به تل د پاکستانیانو په یاد وي ځکه دا داسې پېښه وه چې ترهګرو په کې د خپلو نامشروع موخو لپاره معصوم پاکستاني کوچنیان په نښه کړل.»
د دغه هېواد د کورنیو چارو وزیر محسن نقوي هم په یوه پېغام کې په دې اړه خپله غمرازي شریکه کړې او زیاته کړې یې ده چې «دغه خونړۍ پیښې پاکستانیانو ته د ترهګرۍ د ختمولو انګیزه ورکړې ده.»
پر ټولنیزو رسنیو د دې پیښې د لسم تلین له امله د یوه وژل شوي زده کوونکي د مور ویډیو هم لاس په لاس کېږي چې په کې ادعا کوي چې لس کاله وړاندې تر دې خونړي برید وروسته ورته د پېښور د «قول اردو قوماندان هدایت الرحمن ویلي و چې خیر دی که یو بچې دې ووژل شو ؛نو بل وزېږوه.»
دغه مېرمن زیاتوي: «دوی نه پوهېږي چې د یو ماشوم زېږول او سترول څومره اسان دي؟!»
پېښور کې پر پوځي ښوونځي د برید پېښه په تېره لسیزه کې د پاکستان دننه یو له لویو ترهګریزو پېښو ګڼل کیږي چې په نړۍواله کچه یې غبرګونونه لرل او د پاکستان حکومت هم هغه مهال د ترهګرۍ د ختمولو پر خلاف کلکې ژمنې کړې وې.
د دغه برید مسوولیت د پاکستاني طالبانو تحریک په غاړه اخیستی و او تر لس کاله تېریدو وروسته اوس د دغه وسله والې ډلې بریدونه او فعالیتونه تر پخوا په پاکستان کې ډېر شوي دي.
پښتون سیاستوال او د عوامي ملي ګوند مشر ایمل ولي په خپلو تازه څرګندونو کې اندیښنه څرګنده کړې چې ګنې د خېبرپښتونخواه نیمایي خاوره اوس د پاکستاني طالبانو په ولکه کې ده.
د ایران د کډوالو چارو د مرکز رییس وايي، د بایومټریک په وسیله د بې اسنادو کډوالو پېژندګلوي کوي، څو ایران ته د هغوی د بیا راتګ مخه ونیول شي.
دغه ایرانی چارواکی وايي، ایران هڅه کوي چې د نویو لارو چارو په کارولو سره ایران ته د کډوالو د ننوتلو مخه ونیسي.
د ايران د کډوالو چارو د مرکز مشر نادر يار احمدي د یک شنبې په ورځ د (لېندۍ ۲۵مه) رسنيو ته وويل، چې د دغه هېواد زېربناوې د ډېرو کډوالو د منلو توان نه لري.
نوموړي زياته کړه، چې د ناقانونه کډوالو د راتګ د مخنيوي په موخه د دغه هېواد په ختيځ کې پر سرحد د دېوالونو د جوړولو کار هم په چټکۍ سره روان دى.
همدارنګه د ایران د کډوالو چارو د مرکز دغه رییس وویل، چې د نویو قانوني تصویبونو او د قضایه قوې په مرسته د بې اسنادو کډوالو سره د چلند لپاره نور قانوني اقدامات هم ترسره کېږي.
بلخوا، دغه ایراني چارواکي نن د ایران په مازندران ولایت کې رسنیو ته په یوه بله خبرې ناسته کې وویل، چې په دغه ولایت کې ان د لنډې مودې لپاره هم د افغان کډوالو لپاره کار او اوسېدل منع دي.
نوموړي ټینګار وکړ، چې مازندران د کډوالو په ځانګړې توګه د افغانانو د اوسېدو لپاره یوه منع سیمه اعلان شوې ده.
دغه ایراني چارواکي په داسې حال کې ایران ته د افغان کډوالو د ورتګ د مخنیوي لپاره د نويو تګلارو اعلان کوي، چې ایران په دې وروستیو کې د استوګنې له اسنادو پرته د افغان کډوالو لپاره د ژوند شرایط خورا سخت کړي او د دغو کډوالو د اېستلو بهیر یې هم ګړندی کړی دی.
د ایران حکومت په ګڼو ښارونو کې بې اسنادو افغان کډوالو ته د کار او کورونه په کرایه ورکول جرم بللی دی.
د عوامي نشنل ګوند مرکزي مشر ایمل ولي خان وايي چې پر نیمه پښتونخوا پاکستان ولکه نه لري او د طالبانو په لاس کې ده. ایمل ولي خان د جیو نیوز جرګه خپرونه کې وویل چې پښتونخوا د تاریخ تر ټولو بد حالت کې ده.
د عوامي ملي ګوند مرکزي مشر او د پاکستان د مشرانو جرګې غړي د لیندۍ پر ۲۴مه له پاکستانۍ رسنۍ جیو نیوز سره په خبرو کې وویل چې د دیره اسماعیل خان، وزیرستان، لکي مروت، ټانک، بنو او کوهاټ اړوند پر ډېری سیمو د پاکستاني ځواکونو ولکه ختمه شوې ده.
ایمل ولي خان وايي، د پښتونخوا د زیاتره سیمو واک د ترهګرو په لاس کې دی.
دی زیاتوي چې د پاکستان امنیتي ځواکونه له خپلو نظامي مرکزونو څخه بهر نه وځي او یوازې خپل ځانونه ساتي.
ایمل ولي خان په دې باور دی، چې په افغانستان کې د نظام بدلېدو پر پښتونخوا مستقیم ناوړه اغیز کړی دی.
دغه پښتون سیاستوال د پاکستان د څارګرې ادارې ای اېس ای پخواني رییس فیض حمید نوم واخیست او ویې ویل چې هغه د سولې د خبرو په پلمه ۴۰ زره طالبان پښتونخوا ته راوستل او په لوی لاس یې دا سیمه ناامنه کړې ده.
د فیض حمید دوسیه اوس مهال د پاکستان په نظامي محکمه کې روانه ده.
ایمل ولي خان نیوکه کوي، چې د تحریک انصاف ګوند زنداني مشر عمران خان د خپلې واکمنۍ پرمهال ۱۰۲ تنه پاکستاني طالب وسله وال له زندان نه خوشي کړل او هغه خلک په پښتونخوا کې راج چلوي.
ایمل ولي خان دغه راز د پاکستان تحریک انصاف ګوند په مشرۍ د پښتونخوا ایالتي حکومت تورن کړ، چې د ترهګرو ملاتړی دی.
په دې وروستیو کې په پښتونخوا کې د تحریک طالبان پاکستان او د پاکستان پوځ ترمنځ جګړو زور اخیستی او دواړه لوري یو بل ته د مرګ ژوبلې اړولو ادعاوې کوي.