په غزه کې د اسراییل په تازه برېدونو کې د یوې ښځې په ګډون ۷ کسان وژل شوي او نږدې ۲۳ نور ټپیان دي. روغتیايي چارواکي وايي، اسراییل د غزې په شمال کې د العودا او کمال عدوان پر روغتونونو بریدونه کړي، چې له امله یې شل کسان ټپیان شوي دي
په دغه ټپیانو کې ناروغان او طبي کاروکونکي هم شامل دي.
د راپورونو له مخې، اسراییلي توپچي د غزې په محاصره شوي جبالیه کې د کډوالو په کمپ کې د العوده روغتون په درېیم پوړ ډزې کړي.
بل پلو، په طولکرم کمپ د اسراییل په برید کې لږ تر لږه درې کسان وژل شوي دي.
د فلسطین د روغتیا وزارت ویلي، یوه ښځه وروسته له هغه د ټپونو له امله مړه شوې، چې اسراییلو د اشغال شوې لوېدیځې غاړې په طولکرم کمپ بمباري وکړه.
د لوېدیځې غاړې په بیت فریک ښارګوټي کې د اسراییلي پوځیانو په ډزو کې لږ تر لږه درې کسان ټپیان شوي دي.
اسراییلي ځواکونو په دغه ښار کې د بالسام طبي مرکز هم په خپله ولکه کې راوستې ده.
همدا ډول د اسراییل بې پیلوټه الوتکې د غزې د ملکي دفاعي مرکز دفتر هم په نښه کړی، چې دا ډله په ټوله کې د بېړنیو خدماتو او ژغورنې عملیاتو مسوولیت لري.
د بې پیلوټه الوتکې په دغه برید کې د ملکي دفاع یو غړی له خپل زوی سره وژل شوی.
له غزې یو بل ترلاسه شوي خبر کې راغلي، چې د اسرایيلو بې پيلوټه الوتکې د يکشنبې په ورځ په ديرالبله کې د مرستو پر کاروان بريد کړی، چې له امله يې څلور امنيتي ساتونکي وژل شوي.
دا په داسې حال کې ده، چې د اسراییلو لوموړي وزیر بنیامین نتنیاهو د دوشنبې په ورځ وویل، چې د اوربند او د یرغمل نیونې په اړه په خبرو کې یو څه پرمختګ شوی دی.
