د طالبانو ټولګټو وزارت او ځايي چارواکو خبر ورکړی، چې د زياتې واورې او توپان له کبله سالنګ او د غور- بامیان- کابل لار د ترافیکو پرمخ تړلې ده. د میدان وردګ طالب چارواکو هم له خلکو او موټروانانو غوښتي، چې د کابل- غزني او کابل – باميان پر لار د سفر پر مهال له احتیاط کار واخلي.
د طالبانو تر واک لاندي باختر خبري اژانس د جمعې په ورځ د دغې ډلې د ټولګټو وزارت له قوله ليکلي، چې د سالنګ په شمالي او جنوبي برخو کې ۱۱۶ سانتي متره واوره شوې.
دغه وزارت ويلي، چې د سالنګونو د ساتنې او څارنې کارکوونکي د لارې خلاصولو لپاره اماده دي.
دوی له خلکو غوښتي، چې پر دې لار له سفر ډډه وکړي او په خوندي ځايونو کې پاتې شي.
د غور طالب چارواکو هم خبر ورکړی، چې د تېرې شپې درنې واورې او توپان له امله د کابل ـ غور لویه لاره د تګ راتګ لپاره تړل شوې ده.
طالبان وایي هڅه روانه ده، چې دغه لارې بیرته د ټرافیکو پر مخ پرانیزي، خو وايي خلک دې تر هغه پورې پر دغې لارې سفر نه کوي.
په میدان وردګ کې د طالبانو د والي دفتر په خبرتيا کې د لويې لارې موټر چلوونکو ته جدي خبرداری ورکړی، چې د سفر پر مهال د موټر سرعت کنټرول کړي.
طالبانو لیکلي:«د غرني له دروازې د ارغندۍ تر چوک د لویې لارې موتړ چلوونکي بايد د موټرو سرعت کنټرول کړي او د ځنځیرونو (چینونو) څخه پرته د حرکت کولو اجازه نشته که څوک د دې خبرتیا پابندي ونکړي د امنیتي ارګانونو لخوا به مجازات شي.»
د میدان وردګ طالب چارواکو په دویمه خبرتيا کې ویلي، چې د کابل - بامیان لار د جلریز ولسوالۍ اړوند د اونۍ کوتل په سیمه کې د زیاتې واورې د اورېدو له امله د ترافیکو پر مخ تړل شوې ده.
