د نړۍ تر ټولو زړه ښځه په ۱۱۶ کلنۍ کې مړه شوه
د ټومیکو اتوکا په نوم جاپانۍ مېرمن چې د نړۍ تر ټولو زړه ښځه وه، د ۱۱۶ کلونو په عمر د جاپان د هیوګو ولایت د اشیا ښار په یوه پالنځي کې مړه شوه.
د ټومیکو اتوکا په نوم جاپانۍ مېرمن چې د نړۍ تر ټولو زړه ښځه وه، د ۱۱۶ کلونو په عمر د جاپان د هیوګو ولایت د اشیا ښار په یوه پالنځي کې مړه شوه.
د عمر خوړلو (زړو) کسانو د پالیسیو مسوول یوشیتسوګو ناګاتا وویل، چې اتوکا د ډسمبر په ۲۹مه د جاپان د مرکزي سیمې هیوګو ولایت په اشیا ښار کې په یوه پالنځي کې مړه شوې ده.
د اتوکا په اړه راپورونو کې ویل شوي، چې د ۱۹۰۸ کال د مې میاشتې په ۲۳مه نېټه زېږېدلې وه او د کیلې او د مستو خوند لرونکي جاپاني څښاکو سره یې مینه درلوده.
د عمر خوړلو انسانانو د څېړنې ډلې په وینا، اتوکا تېر کال د ۱۱۷ کلنې ماریا برانیاس له مړینې وروسته په نړۍ کۍ تر ټولو د ډېر عمر لرونکې په توګه اعلان شوه.
په راپور کې د اتوکا په اړه لیکل شوي؛ کله چې هغې ته وویل شول چې د نړۍ د سل کاله لرونکو کسانو نوملړ په سر کې ده، هغې په ساده ډول ځواب ورکړ، "مننه."
د زړو کسانو د پالیسیو د مرکز مسوول ناګاتا وايي، چې اتوکا د جاپان په اوساکا کې زېږېدلې وه او په خپل ښوونځي کې د والیبال لوبغاړې وه.
د راپورونو له مخې، ټومیکو اتوکا دوه ځلې د اونټیک غره ته چې ۳۰۶۷ متره لوړ و، ختلې وه.
د ویلو ده، چې اتوکا په ۲۰ کلنۍ کې واده کړی و او د دوو لوڼو ترڅنګ یې دوه زامن هم درلول.
اتوکا د دویمې نړۍوالې جګړې پر مهال د خپل خاوند د ټوکر فابریکې دفتر مدریت کاوه، خو په ۱۹۷۹ کال کې د خپل خاوند له مړینې وروسته په نارا کې یوازې اوسېده.
له اتوکا څخه اوسمهال یو زوی او یوه لور او پنځه لمسیان پاتې دي.
ناګاتا ویلي دي، چې د نوموړې د جنازې مراسم د هغې د کورنۍ او ملګرو له خوا ترسره شول.
د یادولو ده، چې اوسمهال د نړۍ تر ټولو زوړ انسان ۱۱۶ کلنه برازیلۍ راهبه اناه کینابارو لوکاس ده، چې د اتوکا څخه ۱۶ ورځې وروسته زېږېدلې وه