د چین په تبت کې یوې زورورې زلزلې لږ تر لږه ۵۳ کسان مړه کړي دي
چینایي چارواکي وایي، چې دغې ۶.۸ درجې زلزلې لږ تر لږه ۵۳ کسان مړه کړي او ۶۲ نور بیا ټپیان دي او په ګاونډي نیپال، بوتان او هند کې یې هم ځینې ودانۍ لړزولې دي.
چینایي چارواکي وایي، چې دغې ۶.۸ درجې زلزلې لږ تر لږه ۵۳ کسان مړه کړي او ۶۲ نور بیا ټپیان دي او په ګاونډي نیپال، بوتان او هند کې یې هم ځینې ودانۍ لړزولې دي.
د امریکا ځمک پېژندنې ادارې د دغې زلزلې شدت د ریښتر په کچه ۷.۱ درجې ښودلی دی.
زلزله په ځايي وخت د سهار په ۹:۰۵ دقیقو شوې ده.
د چین دولتي خبري اژانس شینهوا راپور ورکړی، چې دغې زلزلې لږ تر لږه ۵۳ کسان مړه کړي او ۶۲ نور بیا ټپیان دي.
هاخوا نیپالي چارواکې وایي، چې د زلزلې ټکانونه د تبت سره په پوله په اوو غرنیو ولسوالیو کې احساس شوي؛ خو تر دې دمه یې د تلفاتو راپور نه دی راکړل شوی.
د شینهوا د راپور له مخې، د زلزلې د مرکز په ۲۰ کیلومترۍ کې درې ښارګوټي او ۲۷ کلي پراته دي، چې ټول نفوس یې شاوخوا ۶۹۰۰ دی او له ۱۰۰۰ څخه ډېر کورونه په کې زیانمن شوي دي.
زلزلې د بوتان پلازمینه تیمفو او د هند شمالي ایالت بېهار هم ولړزاوه، چې له نیپال سره ګډه پوله لري.
د چين سوېل لويديځه برخه ډېری وخت د زلزلې له کبله ځپل کېږي.
په ۲۰۰۸ کال کې په سیچوان ولایت کې یوې سختې زلزلې شاوخوا ۷۰ زره کسان مړه کړي وو.
د چین د دولتي نشراتو سي سي ټي وي په وینا، په تېرو پنځو کلونو کې د شیګاتسي په ۲۰۰ کیلومترۍ کې دننه ۲۹ زلزلې شوې دي.
په ۲۰۱۵کال کې په ګاونډي نیپال کې کتمندو ته نږدې د ۷.۸ درجې یوه زلزله وشوه، چې په کې شاوخوا ۹۰۰۰ کسان مړه او په زرګونو نور ټپیان شوي وو.
