پاکستاني رسنۍ وايي، چې د دغه هیواد د پنجاب ایالت د «منډي بهاءالدین» ولسوالۍ په یوه کور کې د اور لګېدو له امله د څلورو ښځو او یوې نجلۍ په ګډون شپږ تنه مړه شوي دي. پولیسو ویلي، چې په دې پېښه کې اوه تنه نور تپیان هم دي.
د پاکستان جیونیوز د راپور له مخې چې نن شنبه د (مرغومي ۲۲مه) سهار د دغه هیواد پنجاب ایالت د «منډي بهاءالدین» ولسوالۍ په کوټ پهلي شاه سیمه کې د یوه کور دننه اور لګیدلی چې له امله یې څلور ښځې یوه نجلۍ او یو سړی مړه شوي شوي او اوه تنه نور ټپیان دي.
پولیسو ویلي، چې دغه کور کې د اورلوبو توکو جوړولو لپاره انبار شوي بارود چاودلي چې له امله یې دغه اور لګېدلی دی.
د پولیسو ژغورنکې ډلې ویلي، چې په یوه کور کې د دغو بارودو د چاودنې له امله د دغه کور او ګاونډي کور چتونه راپریوتي دي.
د ژغورنې ډلې چارواکو ویلي، تر خاورو لاندې د څلورو ښځو او یوې نجلۍ په ګډون د شپږو کسانو مړي او اوه نور ټپیان را ایستل شوي دي.
د ژغورنې ډلې په وینا، چاودنه نن سهار شوې او د ګاونډي کور یوه ښځه او یوه نجلۍ تر خاورو لاندې شوي او مړه شوي دي.
د ژغورنې ډلې چارواکي وايي، ټول مړي او ټپيان د سیمې نږدې روغتونونو ته لېږدول شوي دي.
د اورلوبو د توکو جوړولو د باردو چاودنې پېښې په هند، بنګله دېش او پاکستان کې ډیری مهال د اور لګېدو او خلکو د مرګ لامل کیږي، چې حکومتونه یې د مخنیوي له هڅو سره، سره په مهارولو کې پاتې راغلي او ډیری مهال د ښځو او ماشومانو په ګډون خلکو ته په کې مرګ ژوبله اوړي.
