په پاکستان کې د طالبانو د لومړۍ واکمنۍ پرمهال سفیر عبدالسلام ضعیف د طالبانو له مشر هبت الله غوښتي، چې د نجونو د زدکړو لپاره د علماوو اجماع رامنځته کړي ترڅو، د زدکړو ځنېدلی حالت ختم شي. عبدالسلام ضعیف هبت الله ته لیکلي:«دا به ستا د نظام او ټول افغانستان لپاره په ګټه او خیر وي.»
د طالبانو واکمنېدو سره دې ډلې ګام پر ګام د نجونو پر زدکړو او د ښځو پر کار بندیز ولګاوه.
که څه هم پر افغانانو سربېره نړیواله ټولنه او د بشري حقونو ټولنې بیا بیا له دې ډلې غواړي چې دا بندیزونه لرې کړي، خو طالبان کوم شاتګ نه ښيي.
ځینې دا ادارې او د افغان مېرمنو د حقونو فعالان د طالبانو دا بندیزونه جنستیتي توپیر بولي.
د طالبانو دغو بندیزونو او چلن ته په پام د جرمونو نړیوالې محکمې لوی څارنوال تېره اونۍ له دې محکمې غوښتي چې د طالبانو د مشر او لوی قاضي د نیولو حکم وکړي.
ښاغلي ضعیف نن دوشنبې د سلواغې ۷مه په اېکسپاڼه کې د طالبانو د مشر ملاهبت الله او سر قاضي عبدالحکیم حقاني د نیولو لپاره د جرمنو نړیوالې محکمې وروستۍ غوښتنې ته هم غبرګون ښودلی دی.
عبدالسلام ضعیف زیاتوي :« دا چې تر هغه وروسته د پرېکړو د تطبیق لپاره تر اوسه پر خپل خوډ کلک ولاړ دی، دا ثابتوي چې هغه د وینو د تویولو او ظلم طرفدار نه دی، د بشر د حقونو په نامه چې کوم سیاسي ګوزار اوس د ملکرو ملکتونو په چوکاټ د خاصو اهداف لپاره زمونږ پر نظام کېږي، بشري حال هیڅ مرسته نه کوي، بلکې نور هم بشري ناورین ته لاره هواره وي.»
د طالبانو دغه پخواني چارواکي د اېکسپاڼې په یادښت کې لیکلي چې دی د یو افغان په توګه د ملګرو ملتونو ادارې په ځانګړي توګه پر څارنوالۍ او محکمې ږغ کوم چې خپل ناپیلتوب وساتي او د بل چا سیاسي موخو ښکارنشي.
عبدالسلام ضعیف وايي په ۲۰۲۱ کال د ملاهبت الله عمومي عفوې پرېکړه، چې د هغه په وینا ټول وګړي په کې شامل وو او هېڅ استثنا یې نه لرله یوه تاریخي پرېکړه وه.
