د امریکا د استازو جرګې غړی ټیم بورچټ وايي، د بهرنیو مرستو له ځنډېدو سره - سره لا هم د امریکايي مالیه ورکوونکو له ۴۰ میلیونو ډالرو ډېرې پیسې هره اونۍ طالبانو ته استول کېږي.
هغه بریټبارټ نیوز ته زیاته کړه: «موږ ته ویل شوي چې طالبان دغه پیسې ترلاسه کوي.»
د بایډن ادارې له افغانستان څخه د امریکایي ځواکونو له اېستلو وروسته، د طالبانو تر کنټرول لاندې افغانستان ته له درې میلیاردو ډالرو زیاته مرسته کړې ده.
دغه مرستې له افغانستان څخه د امریکايي ځواکونو له وتلو وروسته د رامنځته شوي بشري ناورین د کمولو په موخه ترسره شوي دي.
د بایډن د ادارې چارواکو ویلي و، چې د امریکا دغه نغدي مرستې د ملګرو ملتونو له لارې په افغانستان کې لګول کېږي.
د ستراتیژیکو او نړۍوالو مطالعاتو د مرکز له خوا د یوه راپور له مخې، د سیګار ادارې موندلي چې طالبانو د ملګرو ملتونو اړونده نادولتي موسسو ته د نفوذ کولو له لارې "د پام وړ بشري مرستو" ته لاسرسی موندلی او یا یې ترې ګټه پورته کړې.
د بریټبارټ نیوز د راپور له مخې، طالبان پر مرستندویه موسسو فشار راوړي، چې د خپلو کورنیو غړي د نړۍوالو مرستو تر پوښښ لاندې راولي.
بورچټ د روان کال په جنورۍ کې د امریکا د استازو مجلس ته یوه لایحه وړاندې کړه، چې طالبانو ته د پیسو د استولو مخه ونیسي.
دا لایحه د امریکا له حکومته غواړي، چې په افغانستان کې د نغدي مرستو او دا چې واشنګتن څنګه د طالبانو لاس له دغو مرستو لنډ کړي، راپور وړاندې کړي.
همدا راز دغه لایحه د افغانستان د وجهي صندوق او د طالبانو تر کنټرول لاندې مرکزي بانک په راپور ورکولو هم ټینګار کوي.
بورچټ د جمهوري غوښتونکو غړی او د افغانستان د ملي مقاومت جبهې ملاتړی دی.
د هغه لایحه "د ترهګرو لپاره د مالیاتو قانون" نومېږي.
د امریکا د استازو د جرګې دغه غړي د دې قانوني مسودې په اړه وویل، چې پر دې لایحې ډېر کار شوی او دی په دې لټه کې دی، چې د کانګرس دواړو مجلسونو ته یې وړاندې کړي او پر وخت یې ډونالډ ټرمپ ته واستوي.
ټیم بورچټ ډونالډ ټرمپ ته د امریکا د ولسمشر په توګه تر ټاکل کېدو مخکې یو لیک استولی و او له هغه یې غوښتي وو، چې سمدستي دې طالبانو ته د پیسو لېږل بند کړي.
دا لایحه د امریکا د بهرنیو چارو وزارت اړ باسي، چې له طالبانو سره د هر ډول بهرنۍ مرستې د مخالفت لپاره یوه پالیسي جوړه او پلي کړي.
